Qazaqstannyń syrtqy ister ministrligi Qytaida jazasyn ótep jatqan Aqjarqyn Turlybaidyń qazirgi jaǵdaiy týraly aitty, dep habarlaidy Sputnik Qazaqstan.
Osydan bes jyl buryn ustalǵan Qazaqstan azamaty qazir Qytaidyń Gýanchjoý qalasyndaǵy túzetý mekemesinde qamaýda otyr.
Qazaqstannyń Qytaidaǵy elshiliginiń málimetine súiensek, Turlybai qasyndaǵy sottalǵandarǵa aǵylshyn tilin úiretip júr.
"Kórkem ádebietterdi oqidy. Dene shynyqtyrýmen ainalysady. Qytai tilin jaqsy meńgerip alǵan. Túzetý mekemesindegi jaǵdaiǵa qatysty shaǵymy joq", - delingen syrtqy ister ministrliginiń resmi jaýabynda.
Qazaqstannyń Qytaidaǵy elshiliginiń qyzmetkerleri Gýanchjoýdaǵy túrmege baryp, Turlybaidyń qal-jaǵdaiyn bilip turady eken. Buǵan qosa, aqshalai kómek kórsetip, suraǵan kitaptaryn taýyp beredi.
Ministrliktiń aqparatynsha, qazir Aqjarqyn Turlybaidyń isi QHR Gýandýn ólkesi Joǵarǵy halyq sotynyń qaraýynda. Oǵan qatysty tergeý jumysy júrgizilip jatyr.
"Turlybaidyń zańdy quqyqtaryn jáne múddelerin sotta qorǵaý maqsatynda "Shetelde Qazaqstannyń múddelerin bildirý" baǵdarlamasy boiynsha respýblikalyq biýdjetten bólingen qarajatqa Beijińniń "Dahen" advokattyq kompaniiasynan bilikti zańger jumysqa tartyldy", - delingen habarlamada.
Aita keteiik, Qazaqstan azamaty Aqjarqyn Turlybai 2014 jyly naýryzda Gýanchjoý áýejaiynda ustalǵan bolatyn. Oǵan shekaradan 4,5 keli esirtkini alyp ótpek boldy degen aiyp taǵyldy. Ol kezde otandasymyz 20 jasta bolǵan edi. 2015 jyldyń maýsymynda Qytai soty ony ómir boiyna bas bostandyǵynan aiyrdy. Sotta Aqjarqyn sheteldik dosy aldap ketkenin aityp, kinásin moiyndaǵan joq.
2016 jyly sot sheshimi joiylyp, is qaita qaraýǵa jiberildi.
Aqjarqyn Turlybai 1994 jyly 21 aqpanda týǵan. Qyzdyń otbasy Túrkistan oblysynda turady. Almatydaǵy Qazaq memlekettik qyzdar pedagogika ýniversitetine oqýǵa túsken. Úshinshi kýrstan bastap túngi klýbta daiashy bolyp jumys istep, tabys taba bastaǵan. Qytaiǵa qurbysyna taýar ákelýge kómektesý úshin barypty.
