Qazaqstannyń kórshiles eldiń eshqaisysymen aýmaqtyq daýy joq. Bul týraly «Halyqaralyq qatynastardyń qazirgi zamanǵy júiesindegi Qazaqstan Respýblikasy» atty halyqaralyq konferentsiia barysynda QR Syrtqy ister ministri Muhtar Tileýberdi aitty, dep habarlaidy QazAqparat.
«2020 jyldyń naýryz aiynda qabyldanǵan 2020-2030 jyldarǵa arnalǵan syrtqy saiasat tujyrymdamasy qazaqstandyq diplomatiiany odan ári jetildirýdiń negizin qalady. Bul qujat halyqaralyq arenada ulttyq múddelerdi ilgeriletýdiń strategiialyq basymdyqtary men tetikterin aiqyndaityn negizgi qaǵidattardy qalyptastyrady. Tujyrymdamada syrtqy saiasi kýrs negizderiniń sabaqtastyǵy – kópvektorly, tepe-teńdik, pragmatizm jáne ulttyq múddelerdi qorǵaý saqtalady», - dedi ministr.
Muhtar Tileýberdi Qazaqstan postkeńestik keńistikte alǵashqylardyń biri bolyp memlekettik shekarany onyń búkil uzyndyǵy boiymen resimdegenin jáne búginde kórshiles elderdiń eshqaisysymen aýmaqtyq daýy joq ekenin atap ótti.
Sonymen qatar ministr elimizdiń 2017-2018 jyldary BUU Qaýipsizdik keńesiniń turaqty emes múshesi bolyp sailanýy tarihi oqiǵa bolǵandyǵyn atap ótti. Qazaqstannyń múshe bolýy Ortalyq Aziianyń ózekti máselelerin joǵary deńgeide kórsetýdiń tamasha múmkindigine ainaldy. Óitkeni elimiz saiasi jáne ekonomikalyq ózgeristerdiń tutas keshenin bastan keshirip jatqan aimaqtaǵy barlyq elderdiń ujymdyq múddelerin bildirýge umtyldy. Halyqaralyq arenadaǵy jaýapty da beibitshil saiasatynyń arqasynda elimiz postkeńestik keńistikte birinshi bolyp 2010 jyly EQYU-ǵa basshylyq etý qurmetin ielendi.
«Qazaqstannyń tóraǵalyǵynyń qorytyndysy – EQYU-nyń 21 ǵasyrdaǵy birinshi jáne ókinishke orai, ázirge jalǵyz sammitin elordamyzda ótkizý jáne «Qaýipsizdik qoǵamdastyǵyn qurý jolynda» atty tarihi Astana deklaratsiiasynyń qabyldanýy boldy. Eýropalyq qaýipsizdiktiń aǵymdaǵy daǵdarysy aiasynda Astana sammitiniń murasy qazirde qaýipsizdiktiń qurlyqtyq platformasyn qalyptastyrýda ózektiligin saqtap otyr», - dedi Muhtar Tileýberdi.
