Memleket basshysy Nursultan Nazarbaev «Shýche-Býrabai» kýrort aimaǵyndaǵy jańa týristik nysandarmen tanysty. Sondai nysandardyń biri - Shýche qalasyndaǵy «Býrabai» halyqaralyq shańǵy bazasy, dep habarlaidy QazAqparat tilshisi.
Memleket basshysynyń sapary kezinde jańa shańǵy bazasynda 200-den astam sportshylardyń oqý-jattyǵý jiyny ótip jatty. Qazaqstannyń tramplinnen sekirý sportynyń eń myqty sheberleri jańa keshenniń sapaly ekendigin ózderiniń sheberlikterimen kórsetip berdi.
Elbasyna «Shýche-Býrabai» kýrorty aimaǵyn damytý boiynsha atqarylyp jatqan jumystar týraly QR Premer-Ministriniń birinshi orynbasary Asqar Mamin, QR Mádeniet jáne sport ministri Arystanbek Muhamediuly jáne Aqmola oblysynyń ákimi Málik Myrzalin esep berdi.
«Osyǵan deiin týrizmge onsha kóńil bólinbei keldi. Ár nárseniń óz ýaqyty bar. Jaǵdaiy bar qazaqstandyqtar basqa elderdegi kýrorttarǵa baryp demalyp júrdi. Endigi ýaqytta Qazaqstannyń kórkem jerlerin otandastarymyzǵa ǵana emes, sheteldikterge kórsetetin ýaqyt jetti. Týrizmdi qýatty ekonomikanyń bir salasy dep esepteýimiz kerek. Qazir «Shýche-Býrabai» kýrortyna baryp-kelýge barlyq jaǵdai jasalǵan. «Astana-Kókshetaý» avtobany salyndy. Kókshetaý áýejaiy jumys istep tur. Endi Býrabai kentine ishki joldar salyp, adamdar demalatyndai qolaily jaǵdai týǵyzýymyz qajet. Bul oblys ákimdikterdiń sharýasy. Jalpy Býrabaidy ǵana emes, Imantaý, Shalqar, Baianaýyl, Túrkistanda týrizmdi damytýdy qolǵa alýymyz qajet. Túrkistan týrizmdi damytýǵa óte qolaily. Eń bastysy infraqurylymdy durystaýymyz kerek. Men barlyq oblystarǵa arnaiy tapsyrma beremin», - dedi N.Nazarbaev óz sózinde.
«Býrabai» halyqaralyq shańǵy bazasynyń aýmaǵy 125,54 gektardy quraidy. Qurylys jumystary eki kezeńmen júzege asyryldy. Birinshi kezeńde aýmaǵy 111 gektardy alyp jatqan shańǵy bazasy iske qosylsa, ekinshi kezeńde 90 jəne 125 metrlik tuǵyrdan sekirý nysany qoldanysqa berildi.
Aita keteiik, atalǵan sport keshenin salýǵa barlyǵy 38 milliard teńge qarjy jumsaldy. Shańǵy bazasy qysqy sport túrleri (shańǵy jarysy, biatlon, tuǵyrdan sekirý) boiynsha əlemdik talaptarǵa sai salynǵan. Nysanǵa shańǵy joly, 90 jəne 125 metrlik biiktikten sekirý tuǵyry (tramplin), 200 oryndyq qonaq úii, 250 oryndyq ashana, júzý basseini, dərigerlik-saýyqtyrý ortalyǵy kiredi.
