QR Ishki ister ministriniń orynbasary Iýrii Ilin kóktemgi sý tasqyny jaǵdaiyna daiyndyq týraly baiandady, dep habarlaidy QazAqparat.
Onyń aitýynsha, eldi mekenderdi sý tasqynynan qorǵaý úshin «2017-2020 jyldarǵa arnalǵan sý tasqyny qaýip-qateriniń aldyn alý jáne olardy joiý boiynsha sharalar kesheni» jol kartasy júzege asyrylýda.
«Jol kartasynda 521 is-sharany oryndaý kózdelgen. Bul baǵdarlamany qarjylandyrýǵa respýblikalyq jáne jergilikti biýdjetten 70 mlrd teńge qarastyrylǵan. Úsh jylda jol kartasynyń tapsyrmalaryn iske asyrý 1046 eldi mekenniń 724-indegi qaýip-qaterdi azaitýǵa múmkindik berdi. Bul jumys áli aiaqtalmady, biyl jalǵastyryp, baǵdarlamany tolyǵymen oryndaimyz», - dedi Iu. Ilin QR Parlamenti Májilisinde Ekologiia máseleleri jáne tabiǵat paidalaný komitetiniń otyrysynda.
Jol kartasyna sáikes, 2019 jyly Aqtóbe, Atyraý, ShQO, Jambyl, BQO, Mańǵystaý, Pavlodar, Túrkistan, Qostanai oblystarynda 36 shara jasalǵan.
«Bul eldi mekenderdi sý basý qaýpin týdyrýy múmkin. Jol kartasynda kórsetilgen sharalardyń oryndalmaý sebebi – qarajattyń jetpeýi, jobalyq-smetalyq qujattamanyń bolmaýy jáne Jol kartasynyń kesh oryndalýy. Qazir jergilikti atqarýshy organdardyń basty mindeti – eldi mekenderdi qardan tazartý», - dedi ministrdiń orynbasary.
Ásirese, Nur-Sultan qalasy men oǵan irgeles Aqmola, Pavlodar, Qostanai oblystaryna qar kóp jaýǵan.
«Ońtústik Qazaqstandaǵy Syrdariia sý qoimasynda qaýip joq. Ondaǵy sý 3,6-3,9 mlrd tekshe metrge jetedi. Syrdariiadaǵy muz qalyńdyǵy ótken jylmen salystyrǵanda tómen, sondyqtan sý kóbeigende qabyrshaq muz kóbeiip, kedergi keledi dep oilamaimyz. Ózen alqabynan asyp ketpeidi. Jambyl oblysynda da esh qaýip joq», - dedi Iýrii Ilin.
Almaty oblysy boiynsha kóktemde qar erip, jańbyr jaýǵanda sý tasqyny qaýpi týyndaýy múmkin.
«ShQO boiynsha keibir taýly aimaqtardaǵy qardyń jamylǵysy 25% kóbirek. Qoldaǵy qorymyz erkin jumys isteýge múmkindik beredi. Ótken jyly Semei qalasynda tótenshe jaǵdai boldy, sý qoimasynda keptelis bolyp, muz qatty, sáikesinshe Ertis ózeniniń tasýyna ákep soqty», - dedi ol.
Ishki ister ministrligi sý tasqyny bolǵan jaǵdaida, eń aldymen Ortalyq Qazaqstan aýmaǵy baqylanatynyn aitady.
Iýrii Ilinniń aitýynsha, qardyń kóptiginen Viacheslav sý qoimasy tez tolýy múmkin. Sondyqtan qazir aldyn-ala sýdy aǵyzý týraly sheshim qabyldanbaq.
«Jaýyn-shashyn kóp jaýǵan Aqmola oblysynyń tómengi bóliginde qiyndyq týyndaýy múmkin. Ol jaqta qajetti sharalar qabyldandy, 500-den astam úi esepke alyndy. Qazir ákimdik jańa baǵdarlama ázirlep jatyr, onda qaýipti aýdandarda qalǵan turǵyndardy jańa turǵyn úilerge kóshirý úshin qarajat bólinedi. Sodan keiin biz Atbasardaǵy qaýip-qater rejimin alyp tastaimyz», - dedi Iýrii Ilin.
Sonymen birge, Soltústik Qazaqstandaǵy Sergeevka sý qoimasyndaǵy jaǵdai qalypty. Onda halyqty sý basý qaýpi joq.
