Qazaqstannyń Qarýly Kúshterinde Áskeri paradqa daiyndyq bastaldy, dep habarlaidy "Ult aqparat" QR Qorǵanys ministrliginiń baspasóz qyzmetine silteme jasap.
«Qazirgi tańda «Otar» 40-shy áskeri baza aýmaǵynda Qazaqstan Respýblikasy Qarýly Kúshteriniń áskeri bólimderi men qurylymdarynyń jeke quramy men áskeri tehnikasy jinalyp jatyr», - delingen vedomstvonyń habarlamasynda.
Áskeri bólimder Otan qorǵaýshylar kúnin merekeleý qarsańynda «Matybulaq» poligonynda QR Qarýly kúshteriniń jabdyqtalǵan qazirgi zamanǵy qarý-jaraqtary men áskeri tehnikasyn taktikalyq jáne praktikalyq qoldanylýy barysynda óz sheberlikterin kórsetedi.
Psihologiialyq jáne áskeri daiyndyǵy turǵysynan eń jaqsy daiyndalǵan áskeri qyzmetshilerdi irikteý jer-jerlerdegi pýnktterde júzege asyryldy.
Jattyǵý barysynda saltanatty qoraptardy ornalastyrý reti jasalyp, paradqa qatysýshylardyń quttyqtaý elementteri irikteldi, tý alyp ótý, sondai-aq jeke quramnyń saltanatty marshpen júrý tártibi anyqtaldy. Paradqa daiyndyqty qamtamasyz etý úshin turýǵa qajetti barlyq jaǵdailary bar lagerler tigildi.
2018 jyly Áskeri paradqa 3 myń áskeri qyzmetshi, 300-den astam qarý-jaraq pen áskeri tehnika, 30 ushaq qatystyrylady.
Eske sala ketsek, 2013 jyly «Otar» 40-shy áskeri bazasynda Qazaqstan Qarýly Kúshteri tarihynda alǵash ret áskeri parad ótken bolatyn. Sharaǵa Qazaqstan Prezidenti - QR Qarýly Kúshteriniń Joǵarǵy Bas Qolbasshysy Nursultan Nazarbaev qatysty.
