Qazaqstannyń Islandiiadaǵy jańa Qurmetti konsýly Sigýrdýr Atli Ionsson onlain-kezdesý aiasynda tanystyryldy. Bul týraly SIM habarlady.
Kezdesýge Qazaqstannyń Ulybritaniiadaǵy Elshisi, sondai-aq Islandiia jáne Irlandiiadaǵy Elshisi qyzmetin qosa atqarýshy Erlan Ydyrysov, Islandiia Syrtqy ister ministrligi protokol qyzmeti basshysynyń orynbasary jáne ekonomikalyq máseleler jónindegi direktory Petýr Torstensson, sondai-aq «Arctic Green Energy» kompaniiasy tóraǵasynyń orynbasary jáne aǵa keńesshisi bolyp tabylatyn jańa Qazaqstannyń Islandiiadaǵy Qurmetti konsýly Sigýrdýr Atli Ionsson qatysty.
Kezdesý barysynda Qazaqstan men Islandiia arasyndaǵy saýda-ekonomikalyq jáne investitsiialyq yntymaqtastyqty keńeitý máselesi talqylandy. Atap aitqanda jańartylatyn energiia kózderi, týrizm jáne sport salalaryndaǵy yntymaqtastyq bolashaǵy áńgime ózegine ainaldy. Osy turǵyda Islandiianyń osy salada jinaqtaǵan zor tájiribesin paidalana otyryp, Qazaqstanda geotermaldyq energiia kózderin damytý ózara tiimdi yntymaqtastyqtyń áleýetti jáne ónimdi baǵyty bolyp tabylatyny erekshe atap ótildi.
Sondai-aq Qazaqstandaǵy «Arctic Green Energy» islandiialyq kompaniiasynyń geotermaldyq energiia kózderin damytý salasyndaǵy qyzmeti talqylandy. «Arctic Green Energy» kompaniiasy ekologiialyq taza jańartylatyn energiia kózderin damytýdaǵy, sonyń ishinde qalany ortalyqtandyrylǵan jylýmen qamtamasyz etý, elektr energiiasyn óndirý jáne aýyl sharýashylyǵynyń qajettilikteri úshin geotermaldyq energiiany paidalanýdaǵy jetistikterimen tanymal.
Islandiiamen osy baǵyttaǵy yntymaqtastyq Qazaqstannyń Glazgodaǵy Klimattyń ózgerýi jónindegi BUU-nyń aldaǵy jahandyq konferentsiiasyna daiyndyǵy sheńberinde, sondai-aq tómen kómirtekti damýdyń 2050 jylǵa deiingi eldik tujyrymdamasyn ázirleý konteksinde mańyzdy ról atqarýy múmkin.
Taraptar Qazaqstanda basqa tetikterdiń arasynda geotermaldyq resýrstardy paidalana otyryp, tarifterdi retteýge baǵyttalǵan jylýmen jabdyqtaý týraly zańnyń ázirlenýin oń baǵalady. Onyń islandiialyq «Arctic Green Energy» kompaniiasymen yntymaqtastyq úshin paidasy zor. Geotermaldyq energiiany damytý jónindegi jobalardy iske asyrýdyń tabysty tájiribesi retinde «Arctic Green Energy» Qytaidaǵy qalalardy jylytý jáne salqyndatý jónindegi «Sinopec» kompaniiasymen birge jasalǵan jobany atap ótti. Onyń quny 200 mln. dollardan astam jáne Qytaidyń 2060 jylǵa qarai kómirtegi beitaraptyǵyna qol jetkizý jónindegi áreketteriniń quramdas bóligi bolyp tabylady. Taza jáne turaqty geotermaldyq energiia qoldanystaǵy qazba energiia kózderin almastyrady, kómirtegi shyǵaryndylaryn azaitady jáne Qytaidyń iri qalalaryndaǵy aýa sapasyn jaqsartady.
Kezdesý sońynda E.Ydyrysov qatysýshylardy aýmaǵynda investorlar úshin teńdessiz jaǵdailar jasalyp, aǵylshyn quqyǵy qaǵidattary qoldanylatyn «Astana» halyqaralyq qarjy ortalyǵynyń (AHQO) qazirgi jaǵdaiy men damýy týraly habardar etti. «Arctic Green Energy» kompaniiasyna Qazaqstandaǵy «jasyl» jobalardy damytýǵa basa nazar aýdara otyryp, AHQO alańynda óz ókildigin ashý usynyldy.
