Dýbaidaǵy Dúniejúzilik EXPO-2020 kórmesine qoiylatyn Qazaqstan pavilonyna 9 mlrd teńge jumsaldy. Bul týraly QR saýda jáne integratsiia ministri Baqyt Sultanov aityp berdi, dep habarlaidy QazAqparat.
«Buǵan deiin Dýbaidaǵy Qazaqstannyń pavilonyn ázirleý jumystary júrgizildi, oǵan biýdjetten 9 mlrd teńge bólindi. Bul qarajat esebinen bizdiń pavilon keiinirek Qazaqstan aýmaǵyna jetkiziledi jáne elordada nemese óńirlerde otandyq ónimdi tanystyrý boiynsha qyzmet ete beredi», - dep jaýap berdi ministr QR Prezidenti janyndaǵy Ortalyq kommýnikatsiialar qyzmetinde tilshi suraǵyna.
Aita keteiik, Dúniejúzilik EXPO kórmesi Taiaý Shyǵysta birinshi ret ótkeli otyr jáne ony 25 mln adam tamashalaidy dep kútilýde. Kórme 2020 jyldyń 20 qazanynan 2021 jyldyń 10 sáýiri aralyǵynda «Bolashaq úshin sana-sezimdi biriktirý» taqyrybynda ótedi. Onyń ishinde «Múmkindik», «Mobildilik» jáne «Turaqtylyq» uǵymdaryna basa mán berilmek.
Kórme kesheni «úsh japyraq» pishininde usynylǵan, onyń diametri 150 metrdi quraityn ortalyq nysany «Ál-Vasl» plazasy dep atalady. Ortalyq nysan janynda Birikken Arab Ámirlikteriniń pavilony men 3 taqyryptyq klaster ornalasady. EKSPO kesheniniń jalpy aýmaǵy 438 gektardy quraidy. Onda 150 ga bolatyn kórme aýmaǵy, jerústi metro stansasy, «Dubai South Mall» saýda ortalyǵy, turǵyn úiler, logistikalyq jáne qonaq úi nysandary bar.
