«Qazaqstannyń et odaǵy» birlestiginiń basshysy Asyljan Mamytbekov tiri maldy eksporttaý qoiylǵan shekteýge qatysty pikir bildirdi, dep habarlaidy QazAqparat.
«Maldy tiridei eksporttaýǵa shekteý qoiýdyń bir sebebi – ishki naryqta ettiń baǵasyn tómendetý tapsyrmasyn oryndaý. Alaida bul jaǵdai ishki naryq deńgeiine eshqandai yqpal etpeidi. Eger osy qujat júzege asyp, maldy tiridei eksporttaýǵa shekteý qoiylsa, baǵa tómendemeidi, tek deldaldardyń tabysy arta túsedi», - dedi Asyljan Mamytbekov tilshilerge bergen jaýabynda.
Onyń aitýynsha, ótken jyly Qazaqstannan 160 myń bas iri qara shyǵarylǵan.
«Et naryǵy zańdastyrylmaǵan. Kóp nárse, onyń ishinde mal bordaqylaý oryndary kóleńkede qalyp otyr. Mal iesinen tutynýshyǵa deiin zertteseńiz, etti satyp alyp, qaita satatyndar kóp. Salyqtyq júie jetildirilmegen. Kóleńkede saýda jasaýdyń yńǵailyraq bolatyny sondyqtan. Eksportty shektep tastamai, osy baǵyttaǵy máselelerdiń bárin retke keltirý kerek. Maldyń tiridei satylyp ketýi – onyń baǵasyna oń áserin tigizip otyr. Alaida bul jaǵdai dúkendegi taýar baǵasyna eshqandai áser etpeidi», - dedi et odaǵynyń basshysy.
Asyljan Mamytbekov importqa qatysty pikirin bildirdi.
«Import týraly sóz qozǵaǵanda AQSh, Kanada sekildi memleketter ónimdi eksporttaǵan deńgeiden kem importtamaidy. Ol jaqta importtalǵan et qaita óńdeledi. Al óziniń qymbat ónimin ol elder eksporttaýdy jolǵa qoiǵan», - dedi Asyljan Mamytbekov.
Aita ketsek, jaqynda ǵana Qazaqstanda tiri maldyń eksportyna tyiym salynǵan bolatyn.
