Qazaqstan estrada juldyzdary azamattardy karantin talaptaryn saqtap, úide otyrýǵa shaqyrdy, dep habarlaidy "Ult aqparat".
Belgili ánshi Meirambek Bespaev Instagram paraqshasynda qazaqstandyqtardy saǵynyp júrgenin jazdy.
«Qadirli aǵaiyn, aty jaman indet kún ótken saiyn kúsheiip bara jatyr. Men tanityn biraz jaqyn adam syrqattanyp qaldy. Árkim ártúrli áńgime aityp, san-saqqa júgirtýde. Barynsha abai bolyńyzdarshy. Aýyryp jatqan jandarǵa Alla shipasyn bersin. Janyma jaqyn jandardy, syry birge dostardy, jalpy bárińizdi saǵynyp júrmin. Jarqyldap kúlip, aiqara qushaq ashyp, «baýyrym» dep baýyrǵa basyp amandasatyn kúnge jeteiikshi. Alladan amandyqtaryńyzdy tileimin» dep jazdy ánshi.
MýzART tobynyń ánshisi Sáken Maiǵaziev aýyrǵan qazaqstandyqtarǵa tezirek jazylyp ketýin tiledi. Ol sondai-aq, jaǵymsyz jańalyqtarǵa kóńil túsirmeýge shaqyrdy.
«Áleýmettik jeliler de túnerip ketkendei me, qalai... Sál de bolsa jylý syilap, úmit otyn jaǵyp, ýaiymdaryńyzdy seiiltkim keledi. Ýaiymdamai júrgen jan kemde-kem shyǵar. «Men múlde jańalyq kórmeimin, ásirese, sary basylymdardy kózime de ilmeimyn«, deidi qaryndasym. -Nege, jańalyqtan habardar bolý kerek emes pe? - desem: -»Eger, óte mańyzdy jańalyq bolsa (ómirińizge qaýip tóndirip tursa) ony báribir estisiz. Ózińizge psihologiialyq soqqy beretin, júikeńizdi juqartatyn jańalyqpen janyńyzdy jegidei jep qaitesiz?«, - degen sózine toqtaǵandai boldym. ALLA taǵala aýyryp júrgen jandarǵa shipa bersin. Saqtanyp júreiik, jaqsylar. JARATQAN jaqyndarymyzdyń janymyzdan tabylýyn násip etsin. Barshańyzǵa ALLA jar bolsyn», - dep jazdy ánshi.
Al aktrisa, ánshi Aigúl Imanbaeva COVID-19 juqtyrmaýdyń mańyzdy 5 qaǵidasyn jariialady.
«Aýyryp em izdegenshe, aýyrmaityn jol izde» deitin naqyl sózdi eskere otyryp, COVID-19 virýsynyń aldyn alý úshin osy nusqaýlyqty saqtaǵandaryńyz óte abzal», - deidi ol.
Ánshi Qaraqat Ábildina 3 kún buryn óziniń de syrqattanyp qalǵanyn jazdy.
«Myna virýs meni de ainalyp ótken joq. Eshqaida shyǵyp, eshkimmen kezdespegen edim, qaidan juqty, túsinbeimin. Negizi aýada birdeńe bar-aý. Kúnde jaýyn jaýyp, aýa raiy da sýyp ketip edi. Onyń da áseri boldy ma,bilmeimin ǵoi. Temperatýra joq. Tamaqtan bastalyp, murynym bitelip, kádimgi tumaý siiaqty tóbemnen álsizdik basty. Denem birese tońyp, birese ysyp, birinshi kúni mazam bolmady. Bundai jaǵdaida adamǵa baibalam salý kómektespeidi. Jaman oiǵa berilmei, emdi jaqsy oimen qabyldaý óte mańyzdy. Birden tamyrdan vitamin aralastyryp, askorbin qyshqyly men gliýkoza alyp bastadym. Keshegi salǵan tásil boiynsha ingaliatsiia jasap, tamaq muryndy shaiyp, suiyqtyqty kóp iship, sorpalanyp jyly oranyp jatyrmyn. Balalarymyzǵa saq bolaiyqshy. Aýyrǵan adam bólek bólmede bolyp, balalarǵa jaqyndamaǵany durys. Virýsqa qarsy anaferon, «C» dárimenin ishkizip, aldyn almasa bolmaidy. Bólmeni kvartstap, aýany tazartyp turý da óte mańyzdy. Shúkir, jaǵdaiym keshegiden qaraǵanda jaqsaryp keledi. Alla barshamyzǵa jar bolsyn. Barlyǵy jaqsy bolady», - dep jazdy Qaraqat Ábildina.
Aita keteiik, aktrisa Ásel Sadýaqasova koronavirýs juqtyrǵan bolatyn.
«Men aýyryp qaldym. Maǵan juqpaidy dep qatty úmittenip edim. Búkil ainalam aýyryp jatqanda juqpaýy múmkin emes. Men úshin duǵa tilep qoiyńyzdarshy. Bul jazbamda barlyǵyńyzǵa densaýlyq tileimin. Men siiaqty qydyryp júrmeńizdershi», - dedi aktrisa.
