«Pedagogtar mártebesi týraly» zań jobasynyń tujyrymdamasyn daiyndaǵan jumys toby «Qazaqstannyń eńbek sińirgen ustazy» marapatyn bekitýdi usyndy, dep habarlaidy QazAqparat tilshisi.
«Búgingi tańda pedagogtarǵa jáne pedagogika salasyndaǵy qyzmetkerlerge (azamattyq) beriletin demalystar 56 jáne 42 kúnge sozylady. Bilim salasyndaǵy qyzmetkerler pedagogtar sekildi uzaqtaý demalysty almaidy. Soǵan bailanysty pedagogtardyń barlyǵyna birdei 56 kún jyldyq aqyly eńbek demalysyn berip, teńestirsek degen úmit bar», - dedi «Pedagogtar mártebesi týraly» zań jobasyn daiarlaýshy jumys tobynyń múshesi, Astana qalasynyń gýmanitarlyq kolledjiniń direktory Eldos Nurlanov BǴM-da ótken basqosýda.
Onyń aitýynsha, búgingi tańda Bilim jáne ǵylym ministrliginiń birneshe kótermeleý túrleri bar. Máselen, «Qurmet» gramotasy, Alǵys hat, Bilim salasynyń qurmetti qyzmetkeri, Y.Altynsarin syilyǵy jáne Ǵylymnyń damýyna qosqan úlesi syilyqtary bar.
«Bizdiń oiymyzsha, «Qurmet» gramotasyn alǵan qyzmetkerlerden bastap, nagrada alǵan qyzmetkerlerge tósbelgi berip qana qoimai, tiisti qarajatpen qýattalsa, nur ústine nur bolar edi. Sol sekildi memlekettik nagradanyń qosymsha bir túrin qarastyrsa - «Qazaqstannyń eńbek sińirgen ustazy» degendei ataq berýdi usynamyz. Ol bizdiń oiymyzsha, bul jaqsy usynys. Kórshi elderde mundai nagrada túri bar. Sebebi, pedagog, dáriger, sýdia sekildi qyzmetkerler qoǵamda asa úlken ról atqaratyndyqtan, mundai marapatty qarastyrý oryndy», - deidi Eldos Nurlanov.
Eske sala ketsek, Memleket basshysy Nursultan Nazarbaev Qazaqstan halqyna Joldaýynda 2019 jyly Qazaqstanda «Pedagogtardyń mártebesi» týraly Zań qabyldaý kerektigin aitqan edi.
Aita keterligi, BǴM-daǵy búgingi basqosýda zań jobasy boiynsha eńbek etip jatqan jumys toby muǵalimdi mindetinen tys jumysqa tartqandardy ákimshilik jaýapkershilikke tartýdy usyndy.
