Qazaqstan Respýblikasynyń Portýgaliia Respýblikasyndaǵy Elshisi Dáýlet Batyrashevtyń Portýgaliia Prezidenti Marselý Rebelý de Sozaǵa senim gramotalaryn tapsyrý rásimi ótti, dep habarlaidy QazAqparat syrtqy saiasat vedomostvosynyń baspasóz qyzmetine silteme jasap.
Kezdesý barysynda Qazaqstan Elshisi Qazaqstannyń Prezidenti Qasym-Jomart Toqaevtyń izgi tilekterin Portýgaliia Prezidentine jetkizdi. D.Batyrashev ózara árekettestiktiń barlyq baǵyttary boiynsha yntymaqtastyqty odan ári damytýǵa kúsh salýǵa degen basshylyǵymyzdyń qyzyǵýshylyǵyn rastady. Osy oraida, aǵymdaǵy jyly elimizdiń Portýgaliiadaǵy Elshiliginiń ashylǵandyǵyn atap ótti.
Qazaqstandyq diplomat Prezident Q.Toqaev alǵa qoiǵan negizgi maqsattary men mindetteri týraly, ekonomikany ártaraptandyrý, tranzittik-kóliktik áleýetti ilgeriletý, saiasi jáne áleýmettik-ekonomikalyq salalardy modernizatsiialaý jónindegi sharalary týraly habardar etti.
Taraptar eki el arasyndaǵy qatynastardyń dostyq jáne syndarly sipatyn atap ótti. Saýda-ekonomikalyq jáne investitsiialyq seriktestikti keńeitýge, sondai-aq kópjaqty saladaǵy yntymaqtastyqty tereńdetýge ózara qyzyǵýshylyǵy bildirildi.
Óz kezeginde, M. Rebelý de Soza Qazaqstandy aýqymdy saiasi jáne ekonomikalyq jetistikterimen quttyqtap, Lissabonnyń Qazaqstanmen yntymaqtastyqty jan-jaqty damytýǵa daiyndyǵyn bildirdi. Ol qazaqstandyq-portýgal qatynastaryn sapaly jańa deńgeige kóterýdiń alǵysharttarynyń bar ekenin aityp, osyǵan bailanysty, ekijaqty bailanystardy tereńdetý úshin odan ári tyǵyz ózara árekettestiktiń qajettigin atap ótti.
Kezdesý sońynda M. Rebelý de Soza Qazaqstannyń Elshisin qyzmetke kirisýimen quttyqtap, aldaǵy jumysyna sáttilik tiledi.
