Qazaqstannyń barlyq stantsiialarynda konteinerlerge tieý ruqsat etildi, dep habarlaidy "Ult aqparat" QR Indýstriia jáne infraqurylymdyq damý ministrliginiń Telegram kanalyna silteme jasap.
«Aitarlyqtai perspektivaly konteinerlik tasymaldardy damytý maqsatynda «QTJ-Júk tasymaldary» JShS 2021 jyldyń 31 jeltoqsanyna deiin júk tasymaldaryn júzege asyratyn barlyq stantsiialardyń kirme joldarynda konteinerlerdi tieýge jáne túsirýge ruqsat berdi. Ruqsat eldiń kóliktik jáne tranzittik áleýetin ashý, servis deńgeiin arttyrý jáne ákimshilik kedergilerdi joiý úshin klientke baǵdarlaný sheńberinde berildi»,-delingen habarlamada.
«QTJ-Júk tasymaly» JShS baspasóz qyzmetiniń habarlaýynsha, júk jóneltýshilerge júkterdi tasymaly kezinde vagondardy ǵana emes, konteinerlerdi de paidalanýǵa teń múmkindikter berilgen. Bul jumys eksporttyq júkterdi konteinerleýdi ulǵaitý sheńberinde júrgizilýde. Budan basqa, konteinerlik tasymaldar - ýaqyt talaby, olar qazaqstandyq eksporttaýshylarǵa básekege qabiletti bolýǵa múmkindik beredi. Bul rette kóptegen elder konteinerlik tasymaldarǵa kóshetinin, konteinerlerdi aýystyryp tieý úshin infraqurylym damitynyn eskerý qajet. Mysalǵa, qazirgi ýaqytta Qytai jabyq vagondardaǵy júkti qabyldaýda qiyndyq kórýde, júkti konteinerlerde tapsyrý jyldam júrýde», - dep atap ótti «QTJ – Júk tasymaly» JShS Bas direktorynyń birinshi orynbasary Qanat Kóbesov.
Qazirgi ýaqytta konteinerlerdi paidalaný – Qytaiǵa, Eýropa elderine jáne Ońtústik-Shyǵys Aziia memleketterine ónimderin eksporttaityn temirjol klientteri úshin asa qajetti qyzmet. Konteinerlerdegi júkterdi kóliktiń birneshe túrimen: temirjol, avtomobil jáne teńiz arqyly tasymaldaý ońai, osylaisha júkterdi jetkizý geografiiasy keńeiýde. Sondai-aq shekara mańyndaǵy stantsiialarda konteinerlerdi tasymaldaýǵa jáne qaita tieýge jumsalatyn ýaqyt shyǵyndary qysqartylady.
