Ekologiialyq uiymdar qaýymdastyǵynyń basqarma tóraǵasy, belgili qoǵam qairatkeri Aigúl Soloveva Qazaqstannyń azamattyq qoǵamynda jaýapkershilik bar ekenin aitty.
Onyń paiymynsha, aldaǵy Májilis pen máslihat sailaýyna bailanysty elimizde saiasi belsendilik deńgeii kúrt joǵarylap otyr.
«Bireýleri jańa saiasi partiialardy qurý bastamasyn jariialap jatsa, basqalary sailaýǵa qatyspaitynyn alǵa tartýda. Al partiialardyń taǵy bir bóliginde belsendilik deńgeii edáýir joǵarylaǵanyn baiqap júrmiz. Bul turǵyda azamattyq qoǵam qozǵaýshy kúsh bolyp sanalady. Osy qarasha aiynda Azamattyq forým ótetini belgili, onda azamattyq qoǵamnyń daiyndyǵy men belsendiginiń nátijesi shyǵarylady. Meniń oiymsha, elimizdegi azamattyq qoǵam qarqyndy damý kezeńinde tur. Qazirgi kezde olardyń jaýapkershiligi joǵary ekenin atqarylyp jatqan jumystardan kórýge bolady. Bastapqy kezeńde úkimettik emes uiymdar problemany kótergenimen, ony sheshý joldaryn tiisti deńgeide bilmeitin edi. Al qazir bul sektor naqty qadamdar jasaýǵa qaýqarly ekeni anyq baiqalyp otyr», - dedi A.Soloveva.
Osy oraida ol sailaý aldyndaǵy saiasi landshaft turǵysynda qoǵamdyq saiasat jáne tek taza saiasat bar ekenin baiqaǵanyn jetkizdi. Qoǵamdyq saiasat – ol azamattar ókilderiniń kózqarastary men ustanymdaryn qalyptastyrý. Taza saiasat – ol bilik úshin kúres. Saiasi partiialar bilik úshin talasqa tússe, al úkimettik emes sektor bilik úshin tartys ádil ári taza ótýine yqpal etedi. Sondyqtan sailaý naýqanynda úkimettik emes sektordyń baiqaýshy retindegi máni men mańyzynyń negizi osynda jatyr.
«Atap aitqanda, úkimettik emes uiymdardyń baiqaýshylary tirkeýden ótip, ýchaskeler boiynsha jumys isteidi. Bul rettý sailaý kezinde daýys berý barysyn qaraityn adamdar kóp bolady. Olardyń osy naýqanǵa qatysýy ashyqtyqty qamtamasyz etedi, iaǵni qoǵam sailaý nátijesine senim bildirýi úshin jaǵdai jasaidy. Ózderińiz bilesizder, keibir kórshiles elderde birneshe ret revoliýtsiia ótkenimen, meńzegen nátijesine qol jetkize almady. Olarǵa qaraǵanda biz evoliýtsiialyq jolmen jyljyp kelemiz. Bul óz kezeginde elimizde reformalar júrgizýge, kemshilikterdi aiqyndaýǵa, odan qorytyndy shyǵarýǵa, sondai-aq ary qarai qozǵalýǵa múmkindik beredi», - dep túsindirdi Aigúl Soloveva.
Onyń sózine qaraǵanda, Sybailas jemqorlyqqa qarsy strategiiany iske asyrýǵa syrtqy taldaý jáne baǵalaý júrgizetin respýblikalyq arnaiy monitoring toby tiisti Hartiiany daiarlamaq. Onda EQYU-nyń, halyqaralyq konventsiialardyń negizgi printsipteri, sondai-aq Qazaqstan zańnamasynyń normalary qamtylady. Qujat táýelsiz baiqaýshylardy osy barlyq normalar men printsipterdiń saqtalýyn qaraýǵa shaqyrady. Bul turǵyda sailaý kezinde túsinispeýshilik bolmaýy úshin, sondai-aq naýqan barysynda zańsyzdyqqa jol berilmeýi úshin jaǵdai jasalady. Osy baǵytta qoǵamda atalǵan sailaýǵa qatysty senim de bolady.
«Aldaǵy sailaýda baiqaýshylar sany edáýir artady degen oidamyn. Osy oraida daýys berý protsesi egjei-tegjeili nazarda bolady», - dedi qoǵam qairatkeri.
Onyń pikirinshe, aýmaqtyq jáne ýchaskelik sailaý komissiialary quramynyń eleýli túrde jańarýy da óziniń ońtaily rólin atqarady. Sonymen qatar, prokýratýra organdary zańdylyqtyń saqtalýyn tyńǵylyqty baqylap, eskertýlerge shuǵyl áreket etýi kerek. Sebebi erejeni nemese zańnamany buzý faktileri oryn alsa, bul óz kezeginde qoǵam tarapynan qarsy reaktsiianyń bolýyna yqpal etedi.
A.Solovevanyń atap ótýinshe, biyl keibir memleketterde sailaý naýqany kezinde zańnama talaptarynyń tiisti deńgeide oryndalýyna qatysty qoǵam tarapynan kúdik boldy. Osynyń saldarynan halyq narazylyq bildirip jatty, keiinnen bul qozǵalys jaǵdaidy múldem ýshyqtyryp jiberdi.
«Jalpy, sailaý naýqanyna qatysty boljam aitý qiyn. Degenmen elimizde talaptardyń oryndalýy turǵysynda tiisti zańnamalyq jaǵdailar jasaldy. Menińshe, bizde sailaýǵa senimsizdik bolmaýy úshin táýekelder barynsha eskerildi», - A.Soloveva.
Sóz sońynda ol Qazaqstan halqy turaqtylyq pen zańdylyqty baǵalaitynyn atap ótti. Sondyqtan elimizde ótken sailaýlardaǵy sekildi aldaǵy daýys berý naýqanyn tynysh ári baisaldy túrde ótkizý úshin barlyq jaǵdai bar dep aitýǵa bolady.
