Direktorlar keńesiniń sheshimimen Piter Griffits «Qazaqstannyń aviatsiialyq ákimshiligi» AQ Bas direktory bolyp taǵaiyndaldy. Bul jóninde Azamattyq aviatsiia komitetiniń baspasóz qyzmeti habarlaidy.
«Qazaqstannyń aviatsiialyq ákimshiligi» AQ «100 naqty qadam» Ult josparynyń 68-qadamyn júzege asyrý aiasynda quryldy.
Bul - aviatsiia salasyndaǵy eń jaqsy halyqaralyq normalarǵa sáikes elimizdegi ushý qaýipsizdigin qamtamasyz etýdiń túbegeili jańa tásili. Mundai tásil Qazaqstan Respýblikasynda alǵash ret júzege asyrylýda. Azamattyq aviatsiia komiteti sońǵy 1,5 jyl ishinde azamattyq aviatsiianyń negizgi zańyn jáne 61 ishki-quqyqtyq aktilerdi ázirledi jáne tolyqtyrdy.
Aviatsiialyq ákimshilik jumysyna azamattyq aviatsiia sýbektilerine tehnikalyq baqylaý men qadaǵalaýdy júzege asyrý úshin joǵary bilikti azamattyq aviatsiia mamandary tartylyp, olarǵa saladaǵy kásiporyndarmen sáikes keletin eńbek jaǵdailary qarastyrylady.
Qazaqstannyń aviatsiialyq ákimshiligi ushý qaýipsizdigi salasyndaǵy aviatsiialyq tehnikalyq baqylaý men qadaǵalaýdy qamtamasyz etý úshin sharalardy júzege asyratyn bolady.
Piter Griffitstiń azamattyq aviatsiia salasynda mol tájiribesi bar ekenin atap ótken jón. Ol Ulybritaniia Kólik Ministrliginiń Azamattyq Aviatsiia Departamentin basqardy jáne Ulybritaniianyń Azamattyq Aviatsiia Agenttiginiń (UKCAA) jumysyna jetekshilik etti.
EasyJet Luton kompaniiasynyń ushý qaýipsizdigi jáne aviatsiialyq qaýipsizdigi jónindegi direktory boldy. Ol Saýd Arabiiasynda jańa loýkost Nas Air (Flynas) aviakompaniiasyn iske qosý jónindegi joba jetekshisi boldy. Ol Airbus 320 jáne Boeing 737 ushaqtarynda komandir retinde ushqan.
Birneshe jyldar boiy ol Eýropalyq Komissiiada basshylyq qyzmetter atqardy. Piter Griffits Halyqaralyq áýe kóligi qaýymdastyǵynyń (IATA) Eýropalyq aimaǵynyń vitse-prezidenti boldy jáne azamattyq aviatsiianyń ártúrli kommertsiialyq uiymdaryn basqardy.
Azamattyq aviatsiia komiteti ushý qaýipsizdigi júiesin retteýdiń zamanaýi tásilin engizilýimen elimizde ushý qaýipsizdigi kórsetkishi joǵarylaidy dep josparlap otyr.
