Qazaqstannyń álemdik azyq-túlik habtarynyń biri bolýyna múmkindigi bar. Bul týraly Úkimet otyrysynda QR Premer-Ministri Asqar Mamin aitty, dep habarlaidy QazAqparat.
«Óndiriste klasterlik damytýdy, shaǵyn óndirýshiler men óndirýshilerdi aýyl sharýashylyǵy kooperativterine biriktirýdi yntalandyrý arqyly óńdelgen aýyl sharýashylyǵy ónimderiniń kólemin ulǵaitý kerek. Bul jobalardy iske asyrý eń aldymen, eldiń azyq-túlik qaýipsizdigin qamtamasyz etýge baǵyttalǵan. Jalpy 2023 jyldyń sońyna deiin barlyq negizgi azyq-túlik ónimderi boiynsha importqa táýeldilikti alyp tastaý qajet», - dedi Úkimet basshysy.
Asqar Mamin ishki naryq qamtamasyz etilgennen keiin ónim túrleri men onyń taralý geografiiasyn keńeitý arqyly eksport kólemin ulǵaitý mańyzdy ekendigin aitty.
«Sonymen qatar saqtaý jáne logistika infraqurylymyna qoljetimdilikti qamtamasyz etý qajet. Sebebi taýardyń ózindik qunynda olardyń úlesi basym. Álemdik naryqta azyq-túlik taýarlaryna suranystyń artqanyn eskere otyryp, elimizdiń álemdik azyq-túlik habtarynyń biri bolýyna múmkindigi bar», - dedi Premer-Ministr.
