AQSh pen Reseidegi Qazaqstannyń konsýldyqtary telegram-bot ashty. Bul týraly búgin QR Syrtqy ister ministrliginiń resmi ókili Aibek Smadiiarov aitty, dep habarlaidy "Ult aqparat".
«Qazaqstannyń AQSh-taǵy jáne Resei Federatsiiasyndaǵy elshilikteri konsýldyq bólimniń jumysy men qyzmetteri týraly negizgi suraqtarǵa jaýap berýge arnalǵan telegram-bottardy iske qosqanyn habarlaimyz. Telegram-bot túsindirý sipatynda, iaǵni konsýldyq qyzmetter týraly negizgi aqparatty qamtidy. Onda mátindi taný algoritmi qarastyrylǵan. Bul rette bot kómegimen ótinishti qaraý kezeńin baqylap otyrýǵa bolady», - dedi resmi ókil.
Onyń aitýynsha, qoldanýshy usynylǵan jaýaptardaǵy pýnktteriniń birin tańdaý qajet. Budan ári paidalanýshy qajetti jaýaptar boiynsha ári qarai jyljyp otyrady. Onyń qyzmetterin paidalaný úshin telegramnyń tirkelgen paidalanýshysy bolý kerek.
«Bottar únemi jetildirilip otyrady jáne tek sizderdiń kómekterińiz arqyly naǵyz interaktivti kómekshige ainalatyn bolady. Ony belsendi paidalanýǵa shaqyramyz. Bot jumysy boiynsha óz usynystaryńyz ben eskertýlerińizdi tikelei chat nemese konsýldyqtardyń elektrondyq mekenjailaryna jiberýge bolady», - dedi Aibek Smadiiarov.
