Qazaqstan 1991 jyly táýelsizdikke qol jetkizdi. Osy 30 jyl ishinde kóptegen sportshylar halyqaralyq arenada qazaq eliniń abyroiyn asqaqtatyp, kók týyn jelbiretti. El namysyn qorǵaǵan sportshylar jaiynda QazAqparat tilshisi aityp beredi.
Elimizdiń táýelsizdik alǵanyna biyl 30 jyl toldy. Osy ýaqyt aralyǵynda Qazaqstan sportshylary jazǵy jáne qysqy Olimpiada oiyndaryna qatysyp keledi.
Aita keteiik, 1988 jylǵa deiin qazaq sportshylary KSRO quramasynyń qatarynda óner kórsetti. Al 1992 jylǵy Jazǵy Olimpiada oiyndarynda elimiz táýelsizdigin jariialaǵanymen, sportshylarymyz Birikken komanda quramyna endi.
Ózi jeke el retinde qatysýdy tuńǵysh ret 1994 jyly Norvegiianyń Lillehammer qalasynda ótken XVII qysqy Olimpiadasynan bastady.
Bul bairaqty básekege 67 memleketten 1 737 sportshy qatysty. Olar sporttyń 12 túri boiynsha 61 júlde jiyntyǵyn sarapqa saldy.
Lillehammerde Qazaqstannyń týy astynda 29 sportshy óner kórsetti. Sol jarysta shańǵyshy Vladimir Smirnov qana jeńis tuǵyryna kóterildi. Ol erler arasyndaǵy 50 shaqyrymdyq jarysta máre syzyǵyn birinshi bolyp qidy. Bul – táýelsiz Qazaqstannyń tarihyndaǵy Olimpiada oiyndarynyń birinshi júldesi, azattyqtyń alǵashqy altyny edi.
Kelesi Olimpiada oiyndary eki jyldan keiin, 1996 jyly Amerikanyń Atlanta qalasynda ótti. Jazǵy Olimpiada oiyndarynda qazaqstandyq sportshylar 11 medaldi jeńip aldy. 3 otandasymyz chempion atanyp, jeńis tuǵyrynyń eń biik satysyna kóterildi.
Olar: Vasilii Jirov - 81 kelige deiingi salmaqta judyryqtasqan boksshy. Olimpiada nátijesi boiynsha Vel Barker kýbogyna qol jetkizgen alǵashqy otandasymyz. Iýrii Melnichenko - grek-rim kúresinen 57 keli salmaqta óner kórsetip, jeńimpaz atandy. Aleksandr Parygin bessaiystan Olimpiada chempiony boldy. Boksshy Bolat Jumadilovke (51 kelige deiin salmaqta), nysana kózdeýden Sergei Beliaevke, aýyr atlet Anatolii Hrapatyiǵa kúmis buiyrdy. Qola medalin bylǵary qolǵap sheberleri Bolat Niiazymbetov (63,5 kelige deiin), Ermahan Ybraiymov enshiledi. Sondai-aq nysana kózdeýden Vladimir Vohmianin men erkin kúresten Máýlen Mamyrov aldy.
1998 jyly shańǵyshy Vladimir Smirnov Naganodaǵy (Japoniia) Qysqy Olimpiada oiyndarynda taǵy da erekshelendi.15 shaqyrymǵa erkin stilmen júgirýde ol máre syzyǵyna úshinshi bolyp kelip qola aldy. Ekinshi qola medalin Qazaqstanǵa konkimen júgirýshi Liýdmila Prokasheva ákeldi.
Sidnei Olimpiadasy - 2000 jyl
Sidneiden de (Avstraliia) jerlesterimiz 3 altyn, 4 kúmis medalmen oraldy. Bekzat Sattarhanov - Olimpiada chempiony, 57 kelige deiingi salmaqta óner kórsetti. Ermahan Ybraiymov - 71 kelide bokstasty. Olga Shishigina - kedergilermen 100 m qashyqtyqqa júgirý boiynsha jeńimpaz atandy. Al, boksshylar Bolat Jumadilov (51 kelige deiin) jáne Muhtarhan Dildábekov (+91 keli) jáne erkin kúresten Islam Bairamýkov pen veloshabandoz Aleksandr Vinokýrov kúmis aldy.
2002 jyly Solt-Leik-Sitide (AQSh) jáne 2006 jyly Italiiada ótken Qysqy Olimpiada oiyndarynda qazaqstandyqtar medalsiz qaldy.
2004 jylǵy Afiny Olimpiadasynda 119 qazaqstandyq 17 sport túrinen óner kórsetti. Tek jalǵyz sportshymyz ǵana jeńis tuǵyrynyń eń biik satysyna kóterildi. Ol - 69 keli salmaqta óner kórsetken Bahtiiar Artaev. Ol sondai-aq Olimpiada chempiony ataǵymen qosa, Vel Barker kýbogyn da jeńip aldy. Osylaisha Vel Barker kýbogyn ielengen ekinshi qazaqstandyq boksshy atandy.
Taǵy tórt sportshy kúmis aldy: boksshy Gennadii Golovkin, aýyr atlet Sergei Filimonov, balýandar Georgii Tsýrtsýmia jáne Gennadii Laliev.
Jeńil atlet Dmitrii Karpov, boksshy Serik Eleýov jáne grek-rim kúresinen Mhitar Manýkian qola aldy. Nátijesinde Qazaqstan qorjynyna segiz medal salyndy.
Beijiń Olimpiadasy - 2008 jyl
Beijińde 2 otandasymyz jeńis tuǵyrynan qol bulǵady. Onyń biri 69 keli salmaqta judyryqtasqan boksshymyz Baqyt Sársekbaev bolsa, ekinshisi aýyr atletikadan 94 keli salmaqta synǵa túsken sportshymyz Ilia Ilin bolatyn. Alaida, keiin Ilinniń jeńisin Halyqaralyq olimpiada komiteti doping qoldandy dep qaitardy.
Kúmis medaldi dziýdoshy Ashat Jitkeev (100 kelige deiin), jeńil atlet Olga Rypakova jáne grek-rim kúresiniń balýany Nurbaqyt Teńizbaev (60 kelige deiin) jeńip aldy. Bastapqyda ekeýi de qola júldeger bolǵan, keiinnen qarsylastarynyń doping qoldanǵandary belgili bolyp, olar kúmiske ie boldy. Grek-rim kúresiniń balýany Elena Shalygina, erkin kúresten Marid Mýtalimov, boksshy Erkebulan Shynaliev jáne taekvondoshy Arman Chilmanov qola júldeni enshiledi.
London Olimpiadasy - 2012 jyl
London olimpiadasy táýelsiz Qazaqstan tarihyna altyn áriptermen jazylǵan edi. Onda qazaqstandyq sportshylar 7 altyndy qorjynǵa saldy. Alaida, Halyqaralyq olimpiada komiteti taǵy da doping daýymen 4 sportshymyzdy medalinen aiyrdy. Olardyń ishinde óz ataqtaryn úsh atletimiz saqtap qaldy. Olar: veloshabandozymyz Aleksandr Vinokýrov, úsh qarǵyp sekirý saiysynan Olga Rypakova jáne dańqty boksshymyz Serik Sápiev.
Osy oraida aita keteiik, Serik chempiondyq ataqpen birge Vel Barker kýbogyna ie bolǵan qazaq jerinen shyqqan úshinshi sportshy atandy. Al, aýyr atletikadan Zýlfiia Chinshanlo (53 keli), Maiia Maneza (63 keli), Svetlana Podobedova ( 75 keli) jáne Beijińde de chempion atanǵan dańqty aýyr atletimiz Ilia Ilinniń (94 keli) chempiondyq ataqtary kúshin joidy. Buǵan basty sebep - doping daýy.
Qazaqstan quramasy úshin Sochidegi XXII qysqy Olimpiada oiyndary aitarlyqtai sátti bolmady. Bul Olimpiada da jeńis tuǵyryna mánerlep syrǵanaýshy Denis Ten ǵana shyqty. Ol qola medal oljalady.
Rio Olimpiadasy - 2016 jyl
Qazaqstannan álemdik básekege 26 sport túrinen 104 sportshy qatysyp, baq synady. Qazaqstandyqtar barlyǵy 17 medal (3 altyn, 5 kúmis, 9 qola) alyp, el sporty tarihynda kúmis jáne jalpy júldeler sany jóninen rekordtyq kórsetkishke qol jetkizdi.Altyny azdaý demesek, tórt jylda bir keletin dúniejúzilik dodada el qorjynyna túsken bul júldelerdiń bási joǵary.
Altyn medaldi Nijat Rahimov (aýyr atletika), Dmitrii Balandin (júzý sporty), Daniiar Eleýsinov (boks) jeńip aldy.
2018 jyly Ońtústik Koreianyń Phenchhan qalasyndaǵy XIII qysqy Olimpiada oiyndarynda Qazaqstannyń namysyn sporttyń tórt túrinen 44 sportshy qorǵady. Biraq sońynda bir ǵana qola medal buiyrdy.
Tokiodaǵy 2020 jylǵy jazǵy Olimpiada oiyndary koronavirýs pandemiiasyna bailanysty 2021 jyldyń jazyna aýystyryldy.
