Aqmola oblysynda Qytaidan kelgen bir otbasy aýrýhanaǵa jatqyzyldy. Bul týraly Qazaqstannyń bas sanitarlyq dárigeri Jandarbek Bekshin aitty, – dep habarlaidy QazAqparat.
«Búgin saǵat 11-degi aqparatymyzǵa sáikes, elimizde 4 naýqas statsionarǵa ornalastyryldy. Qazirgi tańda Almaty qalasyndaǵy eki naýqas meditsinalyq kómek alǵannan keiin staitsonardan shyǵaryldy. Sonymen qatar Atyraý oblysynyń Qyzylqoǵa aýdanynda 1 naýqas bar. Ol JRVI diagnozymen em alyp jatyr. Nur-Sultan qalasynda tańerteń Qytaidyń Beijiń qalasynan kelgen 16 jastaǵy oqýshy elordadaǵy Balalar infektsiiasy aýrýhanasynyń statsionaryna jatqyzyldy. Oǵan infektsionist konsýltanttardyń qorytyndysy boiynsha JRVI diagnozy qoiyldy. Bala qazir em alyp jatyr», - dedi bas sanitarlyq dáriger.
Onyń dereginshe, búgin tústen keiin Almaty qalasynda 1 adam dene qyzýymen aýrýhanaǵa jatqyzylǵan. Al Aqmola oblysynda Hainanda demalysta bolǵan bir otbasy músheleri tolyqtai statsionarda em alyp jatyr. Atalǵan otbasynyń 3 balasynyń ekeýinde dene qyzýy kóterilgen.
«Sebebi úshinshi balada da aýrý belgileri boldy. Áke-sheshesinde ondai belgiler joq. Biraq, tyǵyz qarym-qatynasta bolǵannan keiin onda da aýrý belgileriniń anyqtalýy yqtimal», - dedi ol.
Bas sanitarlyq dárigerdiń aitýynsha, aýrýhanalarda meditsinalyq maskalar jetkilikti.
«Sonymen qatar biz ártúrli meditsinalyq maskalardy, birrettik jáne kásibi kostiýmderdi, virýsqa qarsy preparattardy, diagnostikalyq jabdyqtar men materialdardy shuǵyl túrde satyp alamyz. Sonymen qatar otandyq óndirýshilerge dáke tańǵyshtardy jappai óndirýge tapsyrys berildi», - dedi ol.
