Búgin Qazaqstannyń 100 jańa esimin tańdaý protsesiniń endi qalai jalǵasatyny jáne ol protsedýralardyń qalai júzege asatyny jóninde «Qazaqstannyń 100 jańa esimi» jobasy boiynsha jumys toby jáne sarapshylyq toptyń kezekti otyrysynda «Qazkontent» AQ basqarmasynyń tóraǵasy Evgenii Kochetov aityp berdi, dep habarlaidy "Ult aqparat".
«Qazkontent» AQ basshysy Evgenii Kochetov «El.kz» portalyndaǵy «100 jańa esim» boiynsha aýqymdy jumys jasaǵanyn, saitqa kelgen barlyq ótinish qabyldanǵanyn aitty. «Biz jumystyń birinshi kezeńinde jergilikti atqarýshy organdarmen yntymaqtasyp, olardyń usynystaryn jinadyq, endi 1 qazannan aidyń aiaǵyna deiin jumystyń ekinshi kezeńin bastap, osy saittaǵy esimderge halyqtyń onlain rejimde daýys berýin uiymdastyramyz. Sonymen birge úmitkerlerdiń jeńimpaz bolýynyń eń basty kriteriii – Elbasynyń baǵdarlamalyq maqalasynda aitylǵanyndai, Táýelsiz Qazaqstan úshin airyqsha mańyzdy eren eńbegi men jetistikteriniń moiyndalýy», – dedi ol. Odan bólek, jinalǵandarǵa saitta kórsetilgen daýys berýdiń tártibi týraly baiandap berdi.
«Qoldanýshylarǵa yńǵaily bolýy úshin jobaǵa qatysýshylar qyzmet salasyna bailanysty 7 bólimge toptastyrylady. Olar: mádeniet, bilim, qoǵam, óner, biznes, meditsina, ǵylym jáne sport. Bul bólimderdiń árbirine shamamen 30-40 qatysýshy usynylǵan. Olardyń sany sarapshylyq toptyń kandidattardy tańdaýyna bailanysty. Al negizgi kriteriin Memleket basshysy óziniń baǵdarlamalyq maqalasynda aitty», - dedi ol.
Kochetovtiń aitýynsha, qoǵamdyq daýys berýge usynylǵan kandidattyń saittaǵy sýretin basý arqyly onyń jetistikke jetý tarihymen de tanysýǵa múmkindik bar.
«Ashyqtyqty qamtamasyz etý jáne daýys berýdi eseleýge jol bermeý maqsatynda saitqa tirkelý júiesi ornatylǵan. Ony birneshe ádispen júzege asyrýǵa bolady. Alǵashqysy -elektrondy poshta arqyly tirkelý. Ekinshi joly - áleýmettik jelidegi akkaýnttar arqyly avtorizatsiialaný. Qoldanýshy óz úmkitkerin tańdap, daýys berýge daiyn bolǵan kezinde batyrmany bassa jetkilikti. Bul rette qoldanýshy kóp degende 3 adamǵa ǵana daýys bere alady. Bir kandidatqa bir ret qana daýys berýge bolady. Qaita daýys berý múmkin emes. Saitta daýystardy avtomatty túrde sanaý júrgiziledi», - dedi ol.
Otyrysta bulardan basqa da jumys toby men sarapshylardyń birneshe belsendileri sóilep, ózderiniń istegen jumystary men usynystaryn ortaǵa saldy. Jiyndy Aqparat jáne kommýnikatsiialar ministri D.Abaev qorytyndylap, portalǵa esimderi engen barlyq adam belgili bir tabysqa qol jetkizgender, iaǵni olardyń árqaisysy bir jetistiktiń tarihy ekenin aita kelip, BAQ olardy halyqqa tanytýda aianbai eńbek etýleri kerektigin aitty.
