«Qazaqstannyń 100 jańa esimi» jobasynyń aralyq qorytyndysy shyǵaryldy. Bul týraly búgin «Qazaqstannyń 100 jańa esimi» jobasy boiynsha jumys jáne sarapshylyq toptyń kezekti otyrysynda QR Aqparat jáne kommýnikatsiialar ministri Dáýren Abaev aitty, dep habarlaidy QazAqparat.
«Qazirgi ýaqytta irikteý arqyly 515 kandidattan turatyn aralyq pýl jasaqtaldy. Buǵan qosa, arnaiy komissiianyń árbir múshesi atalǵan tańdaýdy shektemei, kandidattardyń jalpy sanynan óziniń paiymynsha, barynsha laiyqty degenderdi derbes qosa alady. Barlyq ótinimder 100esim.el.kz portalynda ornalastyrylǵan», - dedi Abaev.
Onyń aitýynsha, arnaiy komissiia 515 adamnyń ishinen 300 kandidatty iriktep alady jáne olar jalpyhalyqtyq daýys berýge usynylatyn bolady.
«Sizderden qazan aiynyń basyna josparlanyp otyrǵan qoǵamdyq onlain daýys berýge qatysý úshin 300 kandidattan turatyn tizimdi qalyptastyrý boiynsha usynys kútemiz. Osylaisha, aldyn ala 220 kandidat iriktep alynsa, endigi ýaqytta jumys toby 515 kandidattan 300-in tańdaýyn kútetin bolamyz. Osy 300 kandidat onlain daýys berýge shyǵarylady. Menińshe, barlyq qazaqstandyq óz daýysyn bere alady. Bul protseske belsene qatysýǵa shaqyramyz. Halyqtyq daýys berýdi qazan aiynyń sońyna qarai aiaqtap, barlyq sanaq júrgizilgennen keiin Qazaqstannyń 100 esiminiń sońǵy nusqasyn jariialaityn bolamyz», - dedi ministr.
