Janat Elimanovtyń aitýynsha, 2021-2023 jyldarǵa arnalǵan Keshendi jospar aiasynda kóleńkeli ekonomikanyń deńgeiin tómendetý úshin júieli sharalar qabyldanyp jatyr. Keden salasynda 34 qylmystyq is qozǵaldy. Deklaratsiiaǵa engizilmegen taýarlardyń jalpy quny 10 milliard teńgeden asady.
Qasym-Jomart Toqaevqa munai óńdeý zaýyttaryn jańǵyrtýǵa bólingen 20,5 milliard teńge qarjyny jymqyrý faktilerine qatysty qylmystyq ister boiynsha tergeý júrgizilip jatqany týraly málimet berildi.
Agenttik tóraǵasynyń aitýynsha, qoǵamdaǵy áleýmettik máselelerdi sheshýge erekshe kóńil bólinedi. "Tarif" jobasy aiasynda kommýnaldyq qyzmetter salasyndaǵy tarifterdiń negizsiz ósý derekterin anyqtaý jáne monopoliialardan aryltý jumystary jalǵasýda.
Mańǵystaý oblysynda suiytylǵan gazdy satý kezindegi alyp-satý belgileri boiynsha Energetika ministrliginiń, oblys ákimdiginiń laýazymdy tulǵalaryna jáne elektrondy saýda alańdaryna qatysty is tergep-tekserilýde.
Prezidenttiń tapsyrmasy aiasynda qarjyny Qazaqstannan tys jerlerge zańsyz jylystatýǵa qarsy jumystar júrgizilip jatyr. Búginde 7 qylmystyq is tergelip jatyr jáne 28 million AQSh dollary buǵattalǵan.
Memleket basshysy Agenttiktiń qylmystyq jolmen alynǵan kiristerdi zańdastyrýǵa jáne kóleńkeli ekonomikanyń deńgeiin tómendetýge qarsy is-qimyl jónindegi jumystarynyń mańyzdy ekenin erekshe atap ótip, Janat Elimanovqa bizneske qatysty júrgizilip jatqan barlyq qylmystyq isti tergep-tekserý kezinde zańdylyqtyń múltiksiz saqtalýyn qamtamasyz etýdi tapsyrdy.
Prezidenttiń pikirinshe, quqyq qorǵaý jáne baqylaýshy organdar kásipkerlerdiń ótinishterine jedel nazar aýdarýǵa jáne olardyń quqyǵyn shektemeýge tiis. Qasym-Jomart Toqaev shaǵyn jáne orta bizneske memleket tarapynan erekshe qoldaý qajet ekenin aitty jáne bul jerde Qarjylyq monitoring agenttigi mańyzdy ról atqarady dep sanaidy. Quqyq qorǵaý jáne baqylaýshy organdardyń ortaq mindeti – ekonomikamyzdyń ornyqty damýyn qamtamasyz etý úshin elimizde qolaily biznes-orta qalyptastyrýǵa atsalysý.
