Qazaqstan 17 tamyzdan bastap 7 elmen halyqaralyq áýe reisterin kezeń-kezeńimen qaita iske qosady, dep habarlaidy "Ult aqparat".
QR Indýstriia jáne infraqurylymdyq damý ministrliginen málim etkendei, mundai sheshimdi Qazaqstan Respýblikasynyń aýmaǵynda koronavirýs infektsiiasynyń paida bolýy men taralýyna jol bermeý jónindegi vedomstvoaralyq komissiia 11 tamyzda qabyldady.
Oǵan sáikes, 17 tamyzdan bastap Birikken Arab Ámirlikterine, Belarýs, Germaniia, Niderlandy, Mysyr, Ýkraina jáne Reseige halyqaralyq reister kezeń-kezeńimen jańartylady.
«Ministrlik atalǵan elderdiń aviatsiialyq organdarymen birlesip turaqty jolaýshylar reisterin qalpyna keltirý máselesin aldyn ala pysyqtady. Osylaisha, bul elder sanitarlyq-epidemiologiialyq talaptarǵa sáikes (termometriia, áleýmettik distantsiia, maska rejimi, PTR testileý) Qazaqstanmen ushýdy qalpyna keltirýdi qoldaidy.
Sonymen birge, Reseige ushý úshin Resei tarapynan ruqsat talap etiletinin atap ótken jón», - dedi ministrlikten.
Atap ótilgendei, halyqaralyq baǵyttar boiynsha reisterdiń sany áýe qatynasy týraly úkimetaralyq kelisim negizinde jáne ár baǵyttaǵy áýe kemeleriniń kommertsiialyq júktemesine bailanysty oryndalady.
«Reister men biletterdi satý áýe kompaniialarynyń saittarynda jariialanǵan kestege sáikes azamattardyń joǵaryda atalǵan eldermen memlekettik shekaralar arqyly ótýine shekteýler alynyp jáne Qazaqstan men tiisti elder belgilegen sanitarlyq qaýipsizdik sharalary kúsheitilgen jaǵdaida, epidemiologiialyq jaǵdaidyń jaqsarýyna qarai júzege asyrylatyn bolady», - dep naqtylady QR Indýstriia jáne infraqurylymdyq damý ministrliginen.
