QR Ishki ister ministrligi sońǵy bes aida Qazaqstannan 40 myń adam ketkeni týraly aqparatty joqqa shyǵardy, dep habarlaidy "Ult aqparat" ministrliktiń baspasóz qyzmetine silteme jasap.
QR IIM baspasóz qyzmetiniń málimetinshe, BAQ-ta aǵymdaǵy jyldyń 5 aiy ishinde 40 myń Qazaqstan azamatynyń basqa elderge turaqty turý úshin ketkeni týraly burys aqparat jariialanǵan.
«2018 jyldyń 5 aiynda ishki ister organdary azamattardyń elden shyǵýy jóninde 13,5 myń qujat, onyń ishinde Resei Federatsiiasyna - 10,6 myń, GFR - 787, Polshaǵa - 164, AQSh - 143, Kanadaǵa - 52 jáne Izrailge - 44 qujat rásimdelgen.
Qazaqstan Respýblikasynan azamattardyń shetelge turaqty turýǵa ketý sebepteriniń basym bóligi - otbastaryna oralý jáne tarihi otandaryna oralý», - delingen habarlamada.
Ministrliktiń málimetterinshe, 2017 jyly elden basqa memleketterge qonys aýdarý týraly 39,8 myń qujat resimdelgen.
