«Kazakh Tourism» ulttyq kompaniiasy týristik sala boiynsha 2018 jyldyń alǵashqy jartyjyldyǵyn qorytyndylady, dep habarlaidy QazAqparat tilshisi.
Jumys nátijeleri QR Ulttyq ekonomika ministrligi Statistika komitetiniń derekteri negizinde jasalǵan.
Jyldyń birinshi toqsanynda Qazaqstanǵa kelgen sheteldikter sany 1,78 mln adamdy qurady, iaǵni 2017 jyldyń sáikes kezeńimen salystyrǵanda 29,4% ósim bar.
«Kazakh Tourism» ulttyq kompaniiasynyń pikirinshe, bul oraida barlyq memleket arasynan Úndistandy erekshe atap ótýge bolady. Sebebi, 2018 jyldyń alǵashqy úsh aiynda Qazaqstanǵa kelgen týristerdiń 68% - úndistandyqtar. Sondai-aq, elimizde Polsha (35%), Iran (12%), Germaniia jáne Ońtústik Koreia (7%) týristeri kóbeiip keledi.
El ishinde saiahattaýdy qalaityn qazaqstandyqtardyń sany 6,8% artyp, 1 mln 86 myń adamdy quraǵan.
Týrizm indýstriiasynyń negizgi kórsetkishteriniń biri jatatyn orynmen (qonaq úiler, demalys úiler, motelder, balalar lagerleri, týristik bazalar jáne basqalary) qamtý qyzmetiniń kólemi bolyp sanalady. Ulttyq kompaniia málimetterine sáikes, 2018 jyldyń qańtar-naýryz ailarynda 2017 jylǵy kezeńmen salystyrǵanda bir milliardtan astam teńgege qyzmet kórsetilgen. Nətijesinde bul kórsetkish 19,1 mlrd teńgege jetken. Bul Táýelsiz Qazaqstannyń barlyq kezeńindegi eń jaqsy nátije, dep atap ótti «Kazakh Tourism» ulttyq kompaniiasy.
