QR Syrtqy ister ministrligi janyndaǵy syrtqy saiasi zertteýler institýtynyń basqarma tóraǵasy Bolat Nurǵaliev Úkimettiń keńeitilgen otyrysynda Memleket basshysy toqtalǵan jaittar men júktegen mindetterge qatysty pikir bildirdi, dep habarlaidy QazAqparat.
«Qazir túsindirý jumysy óte mańyzdy. Elimizdiń saiasi, ekonomikalyq jáne áleýmettik jańǵyrýynyń jańa joly bastalǵaly tur. Qazaqstan qańtar oqiǵasynan keiin álemniń nazarynda tur. Qańtar oqiǵasy bizge úlken sabaq boldy jáne onyń qaitalanbaýy úshin Úkimet Prezident júktep otyrǵan sharalardy júzege asyrýy tiis. Sebebi Memleket basshysy ár sala boiynsha naqty tapsyrma berip otyr. Basty mindet - halyqtyń jaǵdaiyn jaqsartyp, tabysyn kóterý. Bul jolda bizde tájiribe men tiisti quraldardyń bári bar», - dedi Bolat Nurǵaliev.
Onyń aitýynsha, endigi elde bolatyn ózgeris pen memlekettiń qoldaýyn árbir qazaqstandyq sezinýi tiis.
«Bizdiń salaǵa kelsek, syrtqy ister ministrliginiń basty mindeti - álem elderimen dostyq, yntymaqtastyq qarym-qatynasty odan ári jalǵastyrý, Prezident júktep otyrǵan taǵy bir mindet shetelden iri investitsiialardy tartý. Qazaqstanǵa tartylǵan investitsiianyń paidasyn halyq kórýi tiis. Bizde sheteldik kompaniialarmen jumys isteý tájiribesi men metodikasy bar. Iske kóshetin ýaqyt keldi. Osy oraida aityp ótken jón, elde bolǵan jappai tártipsizdik investitsiia tartýǵa keri áserin tigizbeidi. Sebebi Qazaqstan qashan da sheteldik investorlardyń qyzyǵýshylyǵyn týǵyzyp keledi», - deidi ol.
Sondai-aq, halyqaralyq sarapshy Prezidenttiń shetelge zańsyz shyǵarylǵan qarjyny qaitarý jónindegi tapsyrmasyna qatysty oiyn ortaǵa saldy.
«Bul - búkil qurylymdar birigip kirisetin keshende másele. Atap aitqanda, Ulttyq bank, qarjy monitoringi agenttigi, Bas prokýratýra jáne arnaiy organdar. Bul máseledegi syrtqy ister ministrliginiń róline kelsek, bizde halyqaralyq qylmysty ashýda eldermen ózara áreket etý jónindegi kelisim bar. Biz sol kelisimniń aiasynda áreket ete alamyz. Degenmen shetelge ketken zańsyz qarjyny qaitarý uzaq protsess. Óitkeni, aldymen shetel asqan qarjyny tabý qajet, sodan soń onyń zańdylyǵyn anyqtaý kerek. Iaǵni tez arada jáne ońai sheshiletin sharýa emes. Men birneshe elde elshi boldym, sondyqtan bul protsess qalai júretindigimen tanyspyn. Degenmen Úkimet shetelge zańsyz shyǵarylǵan qarjyny qaitarýda jospar jáne fakti boiynsha áreket etse, sheteldik seriktester bizge qoldaý bildiredi degen senimdemin», - dedi Nurǵaliev.
