Reseide shoshqanyń afrikalyq obasy beleń alýyna bailanysty elimizde saqtyq sharalary kúsheitildi, dep habarlaidy "Ult aqparat".
Soltústik Qazaqstan oblysy veterinariia basqarmasynyń málimetinshe, Reseide búgingi tańda shoshqanyń afrikalyq obasy shyǵyp, mal qyrylyp jatyr. Osyǵan orai Aýylsharýashylyǵy ministrliginiń veterinarlyq baqylaý jáne qadaǵalaý komiteti shoshqa men jabaiy qabandardy, olardyń etin, ónimderi men jemazyǵyna deiin shekaradan kirgizýge tyiym saldy.
«Avtokólikterdi ótkizý beketindegi veterinarlyq-sanitarlyq bekette el aýmaǵyna ótetin barlyq taýarlar men avtokólikter tekseriledi. Omby oblysynda shoshqanyń afrikalyq obasy paida bolǵan eldi mekende 24 jeltoqsanǵa deiin karantin engizildi. Jaǵdaidy qadaǵalap otyrmyz. Shekteý sharalary epizootiialyq jaǵdai túzelgenshe deiin alynbaidy», - deidi SQO veterinariia basqarmasynyń basshysy Berik Áljanov.
Qaýipti aýrýǵa bailanysty SQO-da arnaiy baǵdarlama qabyldandy. Obanyń aldyn alý úshin shoshqa ósiretin sharýashylyqtar men jekemenshik mal ieleri arasynda túsindirý jumystary júrgizilip jatyr.
Mamandardyń aitýynsha, shoshqa obasy adamǵa juqpaidy. Biraq, aýyrǵan mal emdelmeidi, tek joiý kerek. Oǵan qarsy vaktsina áli tabylmaǵan. Aýrý belgileri 2-9 kún ishinde paida bolyp, aýyrǵan mal birneshe saǵattan keiin óledi eken. Obany juqtyrǵan shoshqanyń qyzýy kóterilip, jem jeýden qalady, terisi kógerip, ókpesi qabynady.
Búginde SQO-da 235 myń shoshqa bar.
