Resei Prezidenti Vladimir Pýtin Aziiadaǵy ózara is-qimyl jáne senim sharalary keńesine qatysý úshin Qazaqstanǵa keledi. Bul týraly QR Syrtqy ister ministri Muhtar Tileýberdi aitty, dep habarlaidy Ulysmedia.kz.
«Resei Prezidenti Aziiadaǵy ózara is-qimyl jáne senim sharalary keńesine qatysý úshin Qazaqstanǵa keledi. Sonymen qatar Táýelsiz Memleketter dostastyǵy memleket basshylarynyń keńesin ótkizý josparlanǵan. Biz, Resei Prezidenti qatysady dep kútemiz. Ol qazan aiynyń ortasynda bolady. Resmi rastaýyn kútip otyrmyz. Memleket basshysynyń árbir saparynda ekijaqty kezdesý ótkiziledi», - dedi Muhtar Tileýberdi elordada ótip jatqan Álemdik jáne dástúrli dinder liderleriniń VII sezi aiasynda BAQ ókilderiniń saýalyna orai.
Sonymen qatar ol Qazaqstan qaitalama sanktsiiaǵa tap bolmaityndyǵyn atap ótti.
«Bizde antireseilik sanktsiianyń teris yqpalyn, onyń ishinde qaitalama sanktsiiany ekonomikamyzǵa jibermeý jónindegi úkimettik jumys toby qurylǵan. Jumys toby jemisti jumys istep, eýropalyq komissiiamen, AQSh ákimshiligimen turaqty konsýltatsiia júrgizedi», - dedi ol.
