Foto: Ru.freepik.kz
Qazaqstan kóshi-qon saiasatyn jańartyp, elge joǵary bilikti mamandar men investorlardy tartýǵa basymdyq berip otyr. Bul týraly búgin vitse-premer – Mádeniet jáne aqparat ministri Aida Balaeva málimdedi, dep habarlaidy Ult.kz.
Ministrdiń aitýynsha, 2026 jylǵy 10 sáýirden bastap shetel azamattaryn turaqty turýǵa qabyldaý tártibine qatysty jańa erejeler kúshine engen. Bul ózgerister eldiń adami kapital sapasyn arttyrýǵa jáne suranysqa ie mamandardy tartýǵa baǵyttalǵan.
Qazaqstanda investorlar úshin jeńildetilgen vizalyq rejim saqtalady. Olarǵa investitsiialyq jobalarǵa qatysatyn basshylar men olardyń otbasy músheleri úshin arnaiy vizalar beriledi. Bul el ekonomikasyna erkin kirip, biznes júrgizýge jáne jańa jumys oryndaryn ashýǵa múmkindik beredi.
Sonymen qatar, tapshy mamandyq ielerin tartýǵa erekshe nazar aýdarylyp otyr.
Aida Balaevanyń aitýynsha, arnaiy vizalar men turaqty turýǵa múmkindik beretin sanattar neirohirýrgtar, gematologtar, farmatsevtikalyq injener-tehnologtar, bakteriologtar, grafikalyq animatsiia mamandary siiaqty suranysqa ie kásip ielerine qarastyrylǵan.
Jalpy tizimge 51 mamandyq engizilgen jáne ol turaqty túrde jańartylyp otyrady. Bul tizim el ekonomikasynyń qajettiligine qarai ózgerip otyrady. Kelesi jańartý 2030 jylǵa deiingi kóshi-qon saiasaty tujyrymdamasy aiasynda jyl sońyna deiin júzege asyrylady.
Sonymen qatar jańa viza túrleri engizilýde.
Ministrdiń aitýynsha, joǵary bilikti mamandar men tsifrlyq kóshpendilerge arnalǵan jańa vizalyq sanattar jahandyq talanttar men zamanaýi tehnologiialardy tartýǵa múmkindik beredi.
Sondai-aq memlekettik organdardyń usynysy negizinde shetel azamattaryn jeńildetilgen tártippen elge kirgizý tetigi qarastyrylǵan.
Resmi málimetke sáikes, bul sharalar memleket, biznes jáne qoǵam múddeleriniń teńgerimin saqtai otyryp, Qazaqstannyń ashyq ári zamanaýi kóshi-qon saiasatyn qalyptastyrýǵa baǵyttalǵan.
