Foto:gov.kz
Qazaqstanǵa keletin eńbek migranttarynyń kóbi Qytaidan, -dep habarlaidy "Ult Aqparat".
Eńbek jáne halyqty áleýmettik qorǵaý ministrliginiń habarlaýynsha 2024 jylǵy 1 shildedegi jaǵdai boiynsha jergilikti atqarýshy organdardyń ruqsatymen Qazaqstan aýmaǵynda 14 049 shetel azamaty eńbek etedi.
"Shetel jumys kúshin (budan ári – ShJK) tartýǵa ruqsattardyń arasynda mynadai sanattar bar: basshylar men olardyń orynbasarlary úshin 576 ruqsat (birinshi sanat), qurylymdyq bólimshelerdiń basshylary úshin 2 598 ruqsat (ekinshi sanat). Tartylǵan ShJK negizgi bóligi úshinshi (mamandar) jáne tórtinshi (bilikti jumysshylar) sanattarǵa jatady – tiisinshe olar 5 353 jáne 473 adam. Sondai-aq maýsymdyq jumystarǵa 1 899 adam, al korporativtik aýystyrý aiasynda 3 150 adam tartyldy", -delingen habarlamada.
Qazirgi ýaqytta Qazaqstanda ShJK paidalanatyn 1 796 jumys berýshi bar. Olarda 436,1 myńnan astam Qazaqstan azamaty jumys isteidi, bul qyzmetkerlerdiń jalpy sanynyń 96,8% - y.
Ekonomikalyq qyzmet túrleri boiynsha eń kóp jumys isteitinder qurylys salasynda – 4 397 adam, aýyl, orman jáne balyq sharýashylyǵy – 1 897 adam, ákimshilik jáne kómekshi qyzmetter – 1 592, taý – ken ónerkásibi jáne karerlerdi qazý – 1 293 adam, óńdeý ónerkásibi – 1 252 adam.
Eńbek migranttary keletin negizgi elder: Qytai – 4 123 adam, Ózbekstan – 1 968 adam, Túrkiia – 1 152 adam, Úndistan – 1 114 adam.
"Ishki eńbek naryǵyn qorǵaý maqsatynda QR Eńbek jáne halyqty áleýmettik qorǵaý ministrligi jyl saiyn respýblikaǵa shetel mamandaryn tartýǵa kvota belgileidi jáne bóledi. 2024 jyly jalpy kvota respýblikadaǵy jumys kúshiniń sanyna qatysty 0,23% nemese 22 myń birlik mólsherinde belgilendi", -delingen habarlamada.
