© REUTERS / KAI PFAFFENBACH
Densaýlyq saqtaý ministri Aleksei Tsoi Jambyl oblysynda salynatyn asa qaýipti shtamdar saqtalatyn biologiialyq zerthananyń qurylysyna qatysty túsinikteme berdi, dep habarlaidy Sputnik Qazaqstan tilshisi.
"Qazir bul másele pysyqtalyp jatyr. Memlekette ornalasqan kez kelgen zerthanany tolyǵymen Qazaqstan basqarady. Qazirgi tańda qarjylandyrý máselesi pysyqtalýda. Iá, memleket esebinen qarjylandyrylady...munyń qanshalyqty qajet ekeni zerdelený ústinde", - dedi Tsoi úkimet otyrysynan keiin BAQ ókilderine.
Ministr zerthana qurylysyna jumsalatyn qarjy somasyn naqty bilmeitinin aitty.
Qazaqstanǵa mundai nysan ne úshin qajet degen suraqqa Tsoi elde jumys istep turǵan BSL-3 zerthanasyn mysalǵa keltirdi. Aita keteri, ol bioqaýipsizdiktiń úshinshi deńgeiine ie.
"Bizde BSL-3 zerthanasy bar. Ol COVID siiaqty shtamdardy zertteýmen ainalysady. Osy zerthananyń arqasynda biz vaktsinany tez daiyndap shyǵardyq, shtamdarǵa den qoiý úshin diagnostika ázirledik. Al qarapaiym zerthanada qaýipti shtamdarmen jumys isteý múmkin emes, sebebi olar juqpaly", - dedi Tsoi.
Aitýynsha, mundai zerthanalarda jaǵdai jasalǵan: qorǵanysh kostiýmderi bar, ishtegi aýa arnaiy tazartylyp turady.
"Sol sebepti bul másele zerttelip jatyr. Ázirge bizde mundai zerthana bar, biz onyń bazasynda QazVac vaktsinasyn ázirledik", - dep túiindedi vedomstvo basshysy.
Qazaqstanda asa qaýipti shtamdarǵa arnalǵan biozerthana salýdy kózdeitin úkimet qaýlysy jobasyn qoǵamdyq talqylaý aiaqtaldy. Qujatqa sáikes, 2025 jyldyń tórtinshi toqsanynda Jambyl oblysy Gvardeiskii kentinde biologiialyq zerthana salynady.
Nysannyń tolyq ataýy: BSL-4 zerthanasy men qaýipti jáne asa qaýipti shtamdarǵa arnalǵan jerasty qoimasy.
