Qazaqstanǵa basqa memleketterden koronavirýs juqtyryp kelgen azamattardyń sany birshama azaidy. Bul týraly OKQ-da ótken baspasóz máslihatynda QR Densaýlyq saqtaý vitse-ministri – bas memlekettik sanitarlyq dáriger Erlan Qiiasov málim etti, dep habarlaidy QazAqparat.
«Koronavirýs juqtyrǵandardyń sany azaiyp kele jatqan óńirlerde shekteý sharalary álsin-álsin alynyp jatyr. Atap aitqanda Shyǵys Qazaqstannyń «sary» aimaqqa ótýine bailanysty oblysishilik avtobýs jáne basqa da jolaýshylar kóligi qatynasy qalpyna keltirildi. Aptanyń qai kúnine qaramastan ashyq azyq-túlik bazarlarynyń jumysyna ruqsat berildi. Sonymen qatar tórt oblysta oiyn-saýyq ortalyqtarynyń jumys rejimine ózgerister engizilip, olardyń demalys jáne mereke kúnderi jumys isteýine ruqsat berildi. Sonymen qatar azyq-túlik satatyn jáne satpaityn basqa da bazarlardyń jumysynan tyiym alynyp tastaldy. Almaty qalasynda jáne Qaraǵandy oblysynda saýda jáne halyqqa qyzmet etý nysandarynyń jumysyn qaita bastaýǵa múmkindik berildi», - dedi baspasóz máslihatynda QR Densaýlyq saqtaý vitse-ministri – bas memlekettik sanitarlyq dáriger Erlan Qiiasov.
Vitse-ministrdiń aitýynsha, shekaradaǵy sanitarlyq baqylaý jumysy júrgizilýde.
«9 jeltoqsanǵa deiin memlekettik shekarada tekserý barysynda 635 adamnyń koronavirýs juqtyrǵany belgili boldy. Jalpy syrttan koronavirýs juqtyryp kelgenderdiń sany azaiyp bara jatqanyn atap ótý kerek. Naqtyraq aitqanda memlekettik shekaradan avtokólik arqyly ótkenderdiń arasynda indet juqtyrǵandardyń sany 1,5 ese, áýe jolaýshylardyń arasynda 2 ese azaidy», - dedi ol.
