Densaýlyq saqtaý ministrligi qazaqstandyqtarǵa arnalǵan insýlinniń Ózbekstan dárihanalarynda satylý faktisi boiynsha Ulttyq qaýipsizdik komitetine resmi saýal joldady, dep habarlaidy Sputnik Qazaqstan tilshisi.
Birtanov insýlin boiynsha mundai fakti alǵash tirkelip otyrǵanyn, ony jiti tekserý qajettigin aitty.
"Biz ulttyq qaýipsizdik komitetine resmi saýal joldadyq. Eger rastalsa, buǵan jol bergender qylmystyq jaýapqa tartylady degen úmittemin", — dedi ministr úkimet kýlýarynda.
Onyń aitýynsha, qazir dári-dármek tizim boiynsha satylady, sondai-aq halyq arasynda saýalnama júrip jatyr. Ótken jyldyń qarasha-jeltoqsan ailarynda ministrlikke ózderine tiesili dári-dármekten qaǵylǵan azamattardan shaǵym túsken.
"Bul málimetterdi de biz Bas prokýratýraǵa joldadyq, olar qazir júrip jatqan tekseris materialdaryna qosyldy degen úmittemin. Qazir birqatar óńirde qylmystyq is te qozǵaldy. Iaǵni, bizdiń mindetimiz – quqyq qorǵaý organarymen birlesip, dárimen qamtamasyz etý salasynda tolyǵymen tártip ornatý", —dedi Birtanov.
Eske sala ketsek, Tashkent jýrnalisteri dárihanalardan qazaq tilinde tańbalanǵan insýlin satylyp jatqanyn habarlaǵan edi.
