26 qyrkúiekten bastap «Qazaqstan» Ulttyq telearnasy túsirgen detektiv janryndaǵy alǵashqy telehikaia kórermenge jol tartady, dep habarlaidy «Qazaqstan» RTRK baspasóz qyzmeti.
Jumys kúnderi «Qashqyn» ataýymen efirge shyǵatyn týyndy qoǵamnyń ózekti máselesine ainalyp otyrǵan jemqorlyq, teris dini aǵymdardyń áseri, dástúrdiń qunsyzdanýy, otbasy qundylyqtary siiaqty san túrli taqyryptardy arqaý etedi.
Sonymen qatar, telehikaia búgingi zamandaǵy quqyq qorǵaý ókilderiniń asa qaýipti qylmyskerlerdiń jolyn kesýdegi kásibi jumysy men qoǵam aldyndaǵy aýyr mindetin ashyp kórsetedi.
«Jemqorlyq pen ashkózdik jailaǵan qoǵamda senim, birlik, baýyrmaldylyq joǵalady. Jańa týyndy biik adamgershilik qasiet pen adal eńbek joly ǵana qoǵamdy jaqsylyqqa jeteleitinin, adami órkeniettiń negizi taza jolmen qyzmet etý ekenin ashyp kórsetýdi maqsat tutady.
Telehikaiadaǵy ońai jerden olja izdegen jannyń qaishylyqqa toly, jaǵymsyz ómirin beineleý arqyly ózgelerge oi salýdy kózdedik. Týyndynyń negizgi ideiasy - ainalasyna ziianyn tigizetin adamnyń ómiri tyǵyryqqa tireletinin, zań ádildiginiń qai kezde de ústemdik quratynyn kórsetý», - deidi «Qazaqstan» UTA Efirlik saiasat direktsiiasynyń direktory Baǵjan Bimuratova.
Basty rólderdi QR Halyq ártisi Tilektes Meiramov, QR Eńbek sińirgen qairatkeri Baýyrjan Qaptaǵai, belgili kino jáne teatr akterleri Qýandyq Qystaqbaev, Jandarbek Sadyrbaev, Baqyt Týshaev, Nyshanbek Jubanaev, Nurlan Jumaǵali, Nartai Saýdanbekuly somdaidy.
Telehikaia «Qazaqstan» Ulttyq telearnasynan 26 qyrkúiekten bastap jumys kúnderi 21:30-da kórsetiledi.
Aita ketsek, «Qazaqstan» teleradiokorporatsiiasy biylǵy jyly jalpy sany 2019 bólimnen turatyn túrli janrdaǵy 14 jańa otandyq telehikaia túsirdi. Búgingi kúnge deiin usynylǵan «47 balanyń anasy», «Qanatsyz qustar» telehikaialary kórermen tarapynan joǵary baǵaǵa ie bolyp úlgerdi.
