«KZ-CERT» kompiýterlik oqiǵalarǵa áreket etý qyzmeti qazaqstandyqtardyń jeke málimetteriniń jinalý jaǵdaiy tirkelgenin jariia etti, dep habarlaidy "Ult aqparat" atalmysh qyzmettiń baspasóz qyzmetine silteme jasap.
«KZ-CERT» qyzmetine jýyrda Nur-Sultan qalasynyń bilim basqarmasynan ótinim kelip túsken.
Basqarmadan habarlanǵandai, jýyrda balalardy balabaqshalarǵa tirkeý boiynsha aqyly qyzmet kórsetetin áleýmettik jelidegi paraqshalar jumys istei bastaǵan. Osy rette atalmysh paraqshalar qazaqstandyqtardyń jeke málimetterin zańsyz jinap jatqany azamattardy alańdata túsken.
«KZ-CERT» óz kezeginde taldaý jumystaryn júrgize otyryp, Instagram jelisi men «OLX» onlain-dúkeninde kelesi mátindegi aqparattyń taraǵanyn anyqtap otyr: «Bizdiń paraqsha balabaqshalardaǵy oryndarǵa táýlik boiy monitoring júrgizýmen ainalysady. Biz e.astana.kz elektrondy ákimdiginiń saity arqyly jumys júrgizemiz. Bul Qazaqstan Respýblikasynyń jalpy halqyna qoljetimdi sait. Saitqa elektrondy tsifrly qoltańba (ETsQ) arqyly kirýge bolady. Siz tek ózińizdiń úiińizge jaqyn balabaqshany tańdap alyp, ETsQ kiltin usynsańyz boldy. ESKE SALAMYZ: barlyq jumys zań aiasynda júrgiziledi. Tek baǵyttama berilgennen keiin ǵana aqy alynady. Osydan keiin Sizdiń barlyq jeke málimetterińiz sátti túrde joiylady».
Internet oqiǵalaryna jaýapty qyzmet atalmysh jaǵdaida jeke málimetterdi jinaý jumysy sendirý tetigi arqyly júrgizilip jatqanyn eskertedi.
«Balany balabaqshaǵa kezekke ornalastyrý, kezek nómirin baqylaý, balabaqshaǵa baǵyttama alý – barlyq qyzmetterdi ata-analar e.astana.kz portalynyń saitynan tegin ala alady. Onyń ústine atalmysh qyzmetter úshin eshqandai ETsQ-nyń qajeti joq. Avtorizatsiialaý men ary qarai qyzmetti alý úshin JSN nómirin, ata-ananyń telefon nómirin jáne bir ret tekserýshi SMS-parol nómirin engizseńiz bolǵany. Sol sebepti, bógde adamnyń bul formalardy toltyrýy QR zańnamasyna qaishy keledi. Siz bergen ETsQ kilti men jeke málimetterińiz basqa maqsatta paidalanbaidy dep eshkim kepildik bermeidi», - dep túsindirdi Nur-Sultan qalalyq bilim basqarmasynyń strategiia, taldaý jáne tsifrly tehnologiialar bóliminiń basshysy Jazira Asanova.
Kez kelgen adamnyń ETsQ kiltin taýyp alý arqyly alaiaqtar «Elektrondy Úkimet» portalynda azamattardyń jeke málimetterin paidalanyp, memlekettik qyzmettiń túr-túrin ala alady. Osyǵan bailanysty «KZ-CERT» qyzmeti men elordanyń bilim basqarmasy barlyq ata-analarǵa osyǵan uqsas málimdemelerge senbeýge, qyzmettiń bárin e.astana.kz resmi júiesinde alýǵa shaqyrady. Joǵaryda atalǵan internet-resýrstar anyqtalǵan jaǵdaida 1400 nómirine habarlasýǵa nemese @kzcert telegramm tobyna habar berýge bolady.
«KZ-CERT» kompiýterlik oqiǵalarǵa áreket etý qyzmetiniń nómiri men elektrondy poshtasy: 8-717-255-99-97, 1400(mob.) E-mail: info@kz-cert.kz; incident@kz-cert.kz https://t.me/kzcert.
