2021 jyldyń birinshi jartyjyldyǵynyń qorytyndysy boiynsha jeke menshiktegi múlik boiynsha salyq beresheginiń somasy 23 mlrd teńge boldy, dep habarlaidy "Ult aqparat" Memlekettik kirister komitetine silteme jasap.
Vedomstvonyń málimetinshe, elimizde kólik salyǵy boiynsha jalpy bereshek somasy - 21,5 mlrd teńge, onyń ishinde negizgi somasy - 17,5 mlrd teńge, ósimpuly 3,9 mlrd teńgege jetken.
263 802 jeke tulǵanyń múlik salyǵy boiynsha bereshegi - 1,1 mlrd teńge, onyń ishinde negizgi somasy - 877,1 mln teńge, ósimpuly - 269,9 mln teńge.
Sonymen qatar, 261 801 jeke tulǵanyń jer salyǵy boiynsha qaryzy - 409,5 mln teńge, onyń ishinde negizgi somasy - 282,7 mln teńge, ósimpuly - 126,8 mln teńge.
Komitettiń túsindirýinshe, salyq zańnamasy boiynsha salyq mindettemesiniń oryndalýyn keshiktirgen árbir kún úshin ósimpul esepteledi, al aiyppuldardy qoldaný zańda kózdelmegen.
«Sonymen qatar, salyq mindettemesi oryndalmaǵan nemese tiisinshe oryndalmaǵan jaǵdaida, salyq organdary salyq bereshegin májbúrlep óndirip alýdy qamtamasyz etý úshin salyq zańnamasynda kózdelgen ádisterdi qoldanýǵa mindetti.
Bul rette salyq zańnamasy bankterdiń salyq bereshegi, áleýmettik tólemder boiynsha bereshegi bar salyq tóleýshige (zańdy tulǵa, jeke kásipker, jeke tulǵa) banktik shot ashýdan bas tartý mindettemesin kózdeidi», delingen habarlamada.
Bul ereje memlekettik biýdjetten jáne Memlekettik áleýmettik saqtandyrý qorynan tólenetin járdemaqylar men áleýmettik tólemderdi alýǵa arnalǵan bank shottaryna, bilim berý jinaq salymy sharty boiynsha bank shottaryna qoldanylmaidy. Iaǵni, eger bank shoty jeke tulǵa osy maqsattar úshin ashsa, onda mundai adamnyń salyq bereshegi bolsa da, bank ony ashýdan bas tartýǵa quqyly emes.
«Budan basqa, Salyq kodeksine sáikes salyq bereshegi 1 ailyq eseptik kórsetkishten artyq mólsherde tólenbegen jaǵdaida, salyq bereshegi týraly habarlama berilgen kúnnen bastap otyz jumys kúni ishinde tólenbegen jaǵdaida salyq organy sáikes salyq buiryǵyn shyǵarady jáne ony Qazaqstan Respýblikasynyń atqarýshylyq is júrgizý jáne onyń mártebesi týraly zańnamasynda belgilengen tártippen aimaqtyq jeke sot oryndaýshylar palatasyna nemese ádilet organdaryna májbúrlep oryndaý úshin jiberedi», delingen habarlamada.
