© Sputnik / Bolat Shaihinov
Jeke tulǵalardyń problemalyq mikrokreditterin keshirgen mikroqarjy uiymdarynyń kiristerine úsh jyl boiy salyq salynbaidy. Parlament Májilisi tiisti túzetý kózdelgen zań jobasyn birinshi oqylymda maquldady, dep habarlaidy Sputnik Qazaqstan.
Májiliste depýtattardyń bastamasymen ázirlengen Calyq kodeksine ózgerister men tolyqtyrýlar engizý jónindegi jáne oǵan ilespe salyq salý máseleleri boiynsha zań jobalary qaraldy.
Májilismen Mádi Takievtiń aitýynsha, zań jobalarynyń negizgi normalary prezidenttiń keibir tapsyrmalaryn jáne Konstitýtsiialyq sottyń sheshimderin júzege asyrýdy zańnamalyq turǵyda qamtamasyz etýge baǵyttalǵan.
"Búgingi kúni barshamyzdy tolǵandyryp júrgen ózekti máselelerdiń biri halyqtyń shamadan tys kredit alýyn azaitý úshin jeke tulǵalardyń bereshegi mikroqarjylyq uiymdarmen, kollektorlyq agenttiktermen keshirilgen kezde qalyptasatyn kiristerdi salyq salýdan bosatý kózdelip otyr. Jeke tulǵalardyń problemalyq mikrokreditteri esepten shyǵarylýyna bailanysty mikroqarjy uiymdarynyń kiristerin salyq salýdan ýaqytsha, iaǵni úsh jylǵa bosatý qarastyrylǵan", - dedi Takiev tómengi palatanyń otyrysynda.
Negizgi zań jobasy aiasynda balalarǵa Ulttyq qordyń tabysynan aýdarylatyn nysanaly jinaqtardy salyqtan bosatý usynylǵan.
Sondai-aq elimizdiń azamattary men zańdy tulǵalary sotqa júgingende aiqyndalǵan memlekettik bajdy tóleýge múmkindigi bolmaǵan jaǵdaida, konstitýtsiialyq quqyǵyn tolyq paidalanýyn qamtamasyz etý úshin osy tólemdi keiinge qaldyrý tetikteri kózdelip otyr.
Ekinshi deńgeili bankterdiń Ulttyq bank notalary boiynsha salyq salynatyn kirisin azaitýǵa múmkindik beretin quqyǵyn alyp tastaý josparlanýda.
"Mundai qadam olardy bos qarajattary esebinen ekonomikanyń naqty sektoryn, sonyń ishinde biznesti kreditteýge baǵyttaidy degen senimmen jasalyp otyr", - deidi májilismen.
Buǵan qosa barlyq arnaiy ekonomikalyq aimaqtyń tiimdiligin arttyrý maqsatynda olardyń qatysýshylaryna salyqtyq jeńildikter berýdiń saralanǵan tásilin engizý usynylady.
Odan bólek, EAEO aiasynda alkogol jáne temeki ónimderine aktsizderdiń stavkalaryn kezeń-kezeńimen arttyrý jumysy aiasynda syra qainatý ónimderine aktsiz stavkalaryn litrine 79 teńgeden 90 teńgege deiin kóterý josparlanyp otyr.
Sonymen qatar, salyqtyq ákimshilendirýge qatysty qoldanystaǵy Salyq kodeksiniń keibir normalary naqtylandy. Onyń ishinde jeke tulǵalardyń kiristeri men múlikterin jalpyǵa birdei deklaratsiialaý naýqanynyń alǵashqy eki kezeńiniń ótý nátijelerin eskere otyryp, aldaǵy deklaratsiialaý úrdisine biraz jeńildikter engiziledi.
Májilis depýtattary zań jobalaryn birinshi oqylymda maquldady.
