Arnaiy júrgizilgen saýalnamaǵa qatysqan qazaqstandyqtardyń 87,7 paiyzy sherýge shyǵýdy qalamaityndyqtaryn bildirdi. Bul týraly QR Aqparat jáne qoǵamdyq damý ministri Dáýren Abaev aitty, dep habarlaidy QazAqparat.
«Memleket basshysy 2019 jylǵy 2 qyrkúiektegi Qazaqstan halqyna Joldaýynda Úkimet aldyna mitingiler týraly zańnamany jetildirý jóninde naqty mindet qoidy. Osyǵan sáikes, Aqparat jáne qoǵamdyq damý ministrligimen «Qazaqstan Respýblikasynda beibit jinalystardy uiymdastyrý jáne ótkizý tártibi týraly» jáne «Qazaqstan Respýblikasynyń keibir zańnamalyq aktilerine beibit jinalystardy uiymdastyrý jáne ótkizý tártibi máseleleri boiynsha ózgerister men tolyqtyrýlar engizý týraly» zań jobalary ázirlendi. Zań jobalary «Ashyq málimetter» portalyna jariialanǵan sátten bastap azamattardan 261 pikir tústi. Qazaqstannyń 9 qalasynda tyńdaýlar ótti», - dedi Májiliste atalǵan zań jobalaryn tanystyrǵan ministr.
Onyń atap ótýinshe, Qazaqstanda tirkelgen halyqaralyq uiymdar men diplomatiialyq ókildikterdiń ókilderi úshin de zań jobasynyń jeke tanystyrylymy ótkizildi. Sondai-aq qoǵamdyq, onyń ishinde áleýmettik jelilerdegi pikirler zerdelenip, áleýmettik zertteýler júrgizildi.
«Qarama-qarsy pikirler óte kóp. Bizge, ókiletti memlekettik organ retinde barlyq múddeli taraptardyń qajettiligin qanaǵattandyratyn teńgerim tabý ońaiǵa túsken joq. Konrad Adenaýer atyndaǵy nemis qorynyń qoldaýymen DEMOSCOPE qoǵamdyq pikirdi jedel monitoringileý biýrosy eldiń búkil óńirinde qazaqstandyqtarǵa saýalnama júrgizdi. Onyń nátijesi respondentterdiń 40 paiyzy mitingter eldegi jaǵdaidy tek turaqsyzdandyrady dep sanaityndyǵyn kórsetti. Olardyń 43 paiyzy miting ótkizýdi bilikpen kelisý qajet dep esepteidi», - dedi Dáýren Abaev.
Ministrdiń aitýynsha, Qazaqstannyń qoǵamdyq damý institýty júrgizgen áleýmettik saýalnama barysynda oǵan qatysqan qazaqstandyqtardyń 87,7 paiyzy sherýge shyqqylary kelmeitindikterin aitqan.
«Aqparat jáne qoǵamdyq damý ministrligi júrgizgen áleýmettik saýalnama saýal alynǵan qazaqstandyqtardyń 53,7 paiyzy jinalys ótkizýge ruqsat alý jinalysty ótkizýshiler úshin mindetti bolýy tiis dep sanaityndyǵyn kórsetti. Bul rette respondentterdiń 21,4 paiyzy ǵana Qazaqstanda ótetin mitingterge oń qaraidy», - dedi Dáýren Abaev.
