Illiýstratsiia: elements.envato.com
Qazaqstandaǵy JOO túlekteriniń 40 paiyzy óz mamandyǵy boiynsha jumys taba almai júr. Bul týraly Eńbek jáne halyqty áleýmettik qorǵaý vitse-ministri Erjan Birjanov aitty, - dep habarlaidy Tengrinews.kz.
"Elimizde jumyspen qamtylǵan halyqtyń 15 paiyzynyń tek orta bilimi bar. Olardyń jumys tabýy óte qiyn. Túlekterdiń 40 paiyzdan astamy óz mamandyǵy boiynsha jumys tappaidy. Jastardyń 34 paiyzy mamandyqty ózderi tańdamaidy. Osyndai jastar oqý bitirgennen keiin ol sala boiynsha jumysqa turmaidy, tura almaidy. Sondyqtan, oqýshy mektep qabyrǵasynda ózine ne unaitynyn sheshetindei mektep qabyrǵasynan kásiptik baǵdar alýy kerek, sonda ǵana ol sanaly túrde ózine unaityn ýniversitetke túsedi", - dedi. Birjanov Ortalyq kommýnikatsiialar qyzmetinde ótken brifingte aitty.
Ol jergilikti halyqty jumyspen qamtý, ishki naryqty qorǵaý úshin biyl sheteldik jumys kúshine arnalǵan kvotalar úshinshi jáne tórtinshi sanattar, iaǵni jumysshy mamandyqtary boiynsha 4700 adamǵa qysqartylǵanyn atap ótti. Tiisinshe, úshinshi elderden tartylatyn jumys kúshi azaiady.
"Bizde ózderimen erekshe sóilesýdi talap etetin adamdar sanaty bar. Olar jastar. Kóp jaǵdaida jastar jumyspen qamtý ortalyqtaryna kelmeidi, kókeilerindegi suraqty qoiyp, qyzmet alýǵa júginbeidi. Sondyqtan biz áleýmettik portretten kómekke muqtaj adamdardy anyqtaýǵa múmkindik beretin aqparattyq júie engizemiz. Jumysqa ornalaspaǵan, oqymaǵan, ortalyqqa kelmeitin adamdarǵa proaktivti formatty qoldanatyn bolamyz", - dedi vitse-ministr.
