Qazaqstandyqtar jemqorlyqqa tózimsizdik tanyta bastady. Mundai pikirdi Eýropalyq quqyq jáne adam quqyqtary institýtynyń direktory Marat Báshimov bildirdi, dep habarlaidy QazAqparat.
«Qazirgi ýaqytta bizdiń sanamyz ózgergen. Árkim ózin, otbasyn oilap, qarbalastyq azaidy. Kóptegen jaittan qorqýdy da qoidyq. Mine, osynyń aiasynda jemqorlyqpen ymyrasyz kúres júrgizýimiz qajet», - dedi ol Sybailas jemqorlyqqa qarsy is-qimyl agenttigi alańynda ótken onlain brifing barysynda.
Sonymen qatar M.Báshimov elimizde bul baǵytta júrgizilip jatqan reformalardyń da jemqorlyqpen kúreske oń yqpal tigizip otyrǵandyǵyn basa aitty.
«Adamdar aqshasymen, tamyr-tanysymen jaltaryp ketýine múmkindik beretin barlyq qaltarystarǵa tosqaýyl qoiyldy. Endi adam jasaǵan áreketi úshin túrmege otyratyndyǵyn túsinýi tiis. Qazirgi ýaqytta elimizde «ashyq biýdjet» boiynsha óte jaqsy baǵdarlama júzege asyrylyp jatyr. Osy baǵdarlamanyń arqasynda kez kelgen azamat biýdjettiń ár teńgesiniń qaida jumsalǵandyǵyn qadaǵalap otyra alady. Osy jumysty odan ary jalǵastyrǵan jón», - dedi Marat Báshimov.
Institýt direktorynyń atap ótýinshe, jemqorlardan memleket paidasyna óndirilip alynǵan aqsha qarajatyn densaýlyq saqtaý, bilim berý salalaryna jumsap, aýrýhanalar men mektepter, balabaqshalar salý qajet.
