Habar arnasynyń jańa baǵdarlamasynda qazaqstandyqtar óz ákimderin baǵalai alady, dep habarlaidy "Ult aqparat".
«Jańa maýsymda jańalyqtardy berý tásilin ótkirlep, saraptamalarymyz tereńdei tústi. Materialdar anaǵurlym erkin, ádil jáne túsinikti tilde aitylady. Jańa baǵdarlamalarymyzdyń biri shartty túrde «Ákimder» dep atalady. Onda túsirilim toby óńirlerge, eldimekenderge baryp, halyqtan ákim týraly saýalnama alady. «Ákimdi tanisyz ba?», «Ol qandai paidaly jumys atqardy?» degen suraqtar qoiylady. Barlyq jaýapty jinap, jýrnalist ákimniń ózimen júzdesedi», - dedi «Habar» AQ Basqarma tóraǵasy Erlan Bekhojin Ortalyq kommýnikatsiialar qyzmetinde ótken baspasóz máslihatynda.
Agenttik tóraǵasy Prezident Qasym-Jomart Toqaevtyń halyqqa Joldaýyndaǵy ákimderdiń qyzmeti týraly tapsyrmany eske saldy.
«Preizdent halyqtyń eń kemi 30 paiyzy tanymaityn ákimdi aýystyrý qajettigin aitqan bolatyn. Bizdiń jańa baǵdarlama ákimderdiń jumysyn jandandyryp, halyqqa jaqyn ete túsedi», - dedi ol.
Aita keteiik, «Habar» arnasy Instagram jelisinde jańa telejúrgizýshilerge kasting jariialady. Kastingke kámelettik jasqa tolǵan, Instagram jelisinde akkaýnty bar kez kelgen azamat qatysa alady.
Jaqynda «Habar» agenttiginiń jańa telemaýsymy bastaldy. Agenttik quramyndaǵy respýblikalyq «Habar» men «Habar 24», «Kazakh TV» jáne «EL ARNA» telearnalary jańa baǵdarlamalaryn tanystyrdy.
