QR Premer-Ministriniń orynbasary Jeńis Qasymbek qazaqstandyqtar men sheteldikterdiń jalaqysyn teńestirý jumystary jóninde aityp berdi, dep habarlaidy QazAqparat.
«Jazda dál osy másele jii kóterildi. Onyń basty sebebi – jergilikti bilikti mamandardyń jetispeýshiligi. Sondyqtan Qazaqstan men Qytaidyń birlesken 55 jobasy boiynsha yntymaqtastyq aiasynda investorlar osy kásiporyndardyń bolashaq qyzmetkerlerin oqytýǵa mindettelgen. Máselen, Aqtoǵai – Shyǵys Qazaqstandaǵy iri taý-ken kásiporny mys kenin qazyp, kontsentrat shyǵarady. Vahtalyq ádispen jumys isteidi. Bul kásiporyndy turǵyzýda qazaqstandyqtardyń bári oqytýdan ótti. Bozshakólde de osy ustanym boldy. Shynynda da, másele óte ózekti. Prezident Úkimetke tapsyrma berdi, onymen qazir Úkimet pen Eńbek ministrligi ainalysyp jatyr», - dedi J. Qasymbek.
Onyń aitýynsha, eń aldymen qazaqstandyq jumysshylardyń biliktiligin kóterý qajet.
«Ekinshiden, qaǵidalar saqtalýy tiis, eger Qazaqstan azamaty sheteldikpen birdei jumys atqarsa, tólemaqy da birdei bolýy kerek. Bul máselemen quqyq qorǵaý organdary ainalysyp jatyr», - dedi Jeńis Qasymbek.
