Táýelsizdiktiń 30 jyldyǵyn merekeleý sheńberinde is-sharalar navigatory saitynda Qazaqstannyń jańa tarihyn bilýge arnalǵan onlain-test iske qosyldy, dep habarlaidy "Ult aqparat".
Kvizda KSRO ydyraǵannan keiingi elimizdiń damý kezeńderi, 1991 jyldan qazirgi satyǵa deiingi ýaqyt shejiresi týraly suraqtar jinaqtalǵan.
Joba QR Aqparat jáne qoǵamdyq damý ministrliginiń qasyndaǵy jobalyq keńsemen Qazaqstan Táýelsizdiginiń 30 jyldyǵyna orailastyrylǵan.
Onlain-test 30jyl.kz – QR Táýelsizdiginiń 30 jyldyǵy aiasynda ótkiziletin barlyq is-sharalar týraly anonstar men jańalyqtar ornalastyrylatyn arnaiy saitta ázirlendi. Shilde aiynan bastap 30jyl.kz saitynda kez kelgen internet qoldanýshylar táýelsiz Qazaqstan tarihyn qanshalyqty jaqsy biletinin baiqap kóre alady.
Testiden ótý qorytyndysy boiynsha ár qatysýshy óziniń derbes onlain-sertifikatyn alady. Barlyq qatysýshylardyń nátijeleri durys jaýaptar sany men jumsalǵan ýaqyt negizinde qalyptasatyn jalpy reitingke engiziledi.
Jyl sońynda eń nátijeli qatysýshylar estelik syilyqtarǵa ie bolady.
