Qazaqstandyqtar qaterli isik boiynsha tekserýden qalai óte alady? Tilshilerdiń bul suraǵyna Densaýlyq saqtaý ministri Eljan Birtanov jaýap berdi, dep habarlaidy "Ult aqparat".
«Skriningtiń buiryqpen bekitilgen tegin úsh túri bar. Jalpy, kúdik-kúmán týǵan jaǵdaidaǵy tegin qyzmettiń spektrin kóbeittik. Iaǵni, osy jyldan bastap, kompiýterlik tomografiia – MRT-ny engizdik. Buryn ol aqyly edi. Biyldan – qyrkúiekten bastap qarjylandyrýdy arttyryp, obyrǵa qatysty kúdik-kúmán týǵan jaǵdaida tegin tekseristen ótýge bolady. Alaida sút bezi qaterli isigi, kolorektaldy isik, jatyr moiny isigin anyqtap beretin skriningtiń naqtylyǵy dáleldengen úsh túri bar», - dedi Eljan Birtanov elordada ótip jatqan Onkologiiadaǵy Dúniejúzilik kóshbasshylar sammitinde tilshilerdiń suraǵyna jaýap bere otyryp.
Áitse de, ministr bári tegin bolýy kerek degen pikirdi quptamaitynyn bildirdi.
«Eger másele sizdiń ómirińizge, densaýlyǵyńyzǵa, otbasyńyzǵa tirelip tursa, onda, skriningten aqyly túrde ótýden bas tartpaý kerek. Qazirgi tańda tehnologiia buǵan múmkindik berip otyr. Ýaqyt óte kele jańa tehnologiialar engiziledi. Máselen, aldaǵy ýaqytta naryqqa enip kele jatqan molekýliarly-genetikalyq zertteýdi alaiyq. Sarapshylardyń aitýynsha, jaqyn arada adamdar óz boiyndaǵy tuqym qýalaityn dertterdi kóre alatyndai jaǵdaiǵa jetedi. Bul zertteýler ázirge qymbat. Biraq, meniń oiymsha, Qazaqstanda aldaǵy 3-5 jylda ol tehnologiialar qoljetimdi bolady. Ázirge, men qazaqstandyqtarǵa óz densaýlyǵyn oilaýdy usynamyn. Óitkeni, bul eń aldymen sizdiń otbasyńyzdyń amandyǵy. Memleket árdaiym tegin meditsinalyq kómektiń kólemin arttyrýǵa tyrysatyny anyq. Máselen, meditsinalyq saqtandyrý aiasynda aldaǵy 3-4 jylda tegin meditsinalyq kómektiń kólemin eki ese arttyramyz», - dedi ol.
Ministrdiń aitýynsha, aldaǵy jyldary Qazaqstanda obyrmen kúreske qarajat burynǵydan kóbirek bólinedi.
«Alaida ár adam densaýlyǵy tek ózine kerek ekenin uǵýy tiis. Kez kelgen kisi óz densaýlyǵyn oilaýy tiis. Ǵylym kóp nárseni dáleldedi. Qazir aqparattardyń kóbi qoljetimdi. Denińizdiń saýlyǵyn saqtaý ainalyp kelgende úlken kúsh jumsaýdy qajet etpeidi», - dep túidi ministr.
Eske sala ketsek, elordada Onkologiiadaǵy Dúniejúzilik kóshbasshylar sammiti ótip jatyr. Forýmǵa Halyqaralyq obyrǵa qarsy odaq (UICC) prezidenti, joǵary mártebeli hanshaiym Dina Maired qatysýda.
