Qazaqstan azamattary 13 aqpannan bastap ózimen birge júrgizýshi kýáligi men tehpasportty almai júre alady. Bul týraly QR IIM Ákimshilik politsiia komiteti tóraǵasynyń orynbasary Serik Túsipov aitty, dep habarlaidy QazAqparat.
Onyń atap ótýinshe, 1 aqpanda Memleket basshysy qol qoiǵan «Qazaqstan Respýblikasynyń keibir zańnamalyq aktilerine jol júrisi máseleleri boiynsha ózgertýler men tolyqtyrýlary engizý týraly» Zań resmi jariialanǵannan keiin 10 kúntizbelik kún ótken soń ǵana kúshine enedi. Zań 2 aqpan kúni «Egemen Qazaqstan» men «Kazahstanskaia pravda» gazetterinde jariialandy jáne 13 aqpannan bastap kúshine enedi.
«Sonymen qatar qazirgi ýaqytta ministrlik Jol júrisi erejesine Qazaqstanda berilgen qujattardy ózimen birge júrgizýshilerdiń alyp júrý mindetin alyp tastaý bóliginde tiisti ózgertýler engizip jatyr. Bul rette Zań atalǵan Jol júrisi erejesinen joǵary turatyndyǵyna nazar aýdartqym keledi Demek, politsiia qyzmetkerleri Jol júrisi erejesiniń normasyna bola qujattardy talap etpeidi», - dedi Serik Túsipov.
Sonymen qatar ol júrgizýshi kýáligimen tehpasport berý qyzmeti jalǵasa beretindigin atap ótti.
«Jyl saiyn shamamen 500 myń júrgizýshi kýáligi jáne shamamen 1,5mln tehpasport beriledi», - dedi komitet tóraǵasynyń orynbasary.
