Qazaqstandyqtar 2021 jyldyń aqpan aiynda ekinshi deńgeili bankterden jáne banktik emes aiyrbastaý pýnkterinen jalpy salmaǵy 59,2 keli, 2 309 altyn quima satyp aldy, dep habarlaidy "Ult aqparat".
Ulttyq banktiń málimetinshe, 2017 jyldan bastap jalpy salmaǵy 1,74 tonna bolatyn 47 302 altyn quima satyldy.
Altyn quimalary 5, 10, 20, 50 jáne 100 gramdyq bolyp bes salmaqta satylǵan. Sonyń ishinde eń kóp satylǵany 10 gramdyq quima.
Satylǵan barlyq quimanyń ishindegi onyń úlesi 28% – 12 932 dana. Odan keiin 100 gramdyq quima - 10 830 dana (23%) jáne 20 gramdyq - 10 637 dana (22%), 5 gramdyq – 7 235 dana (15%), 50 gramdyq – 5 668 dana (12%).
Negizinen ólshengen quimalar Almaty, Nur-Sultan jáne Atyraý qalalarynda suranysqa ie.
«Altyn quimalar senimdi investitsiialyq qural bola alady. Bankter men banktik emes aiyrbastaý pýnktteriniń klientke aqshasyn tólep, quimalardy «kúnbe-kún» satyp ala alatyn múmkindigi – altyn quimalar naryǵynyń ótimdiligin qamtamasyz etýde negizgi faktorǵa ainalyp otyr. Baǵdarlama iske qosylǵan ýaqyttan beri jalpy salmaǵy 3,7 keli ólshengen tek qana 140 quima satyp alýǵa qabyldandy. Bul, árine, altyn quimalardyń uzaq merzimdi investitsiialaý men jinaqtaý quraly bolýyna bailanysty» - dep habarlady Ulttyq bank.
Árbir quima qorǵanysh elementterimen jabdyqtalǵan (quimalardyń bet jaǵy ainadai, mikromátin jáne bederli gýrt), sonymen birge quimalardy mehanikalyq zaqymdanýdan qorǵaityn jáne qaptamasynyń ashylǵan-ashylmaǵanyn tez anyqtaýǵa múmkindik beretin arnaiy qaptamada shyǵarylady. Qorǵanysh qaptamasy da quima sapasynyń sertifikaty sanalady. Sondyqtan quimany uqypty saqtap, qaptamasyn ashpaǵan durys.
Qazirgi ýaqytta altyn quimalardy Halyk Bank-te, Eýraziialyq bankte, Jusan Bank-te, Bank TsentrKreditte, sondai-aq banktik emes aiyrbastaý pýnktterinde satyp alýǵa jáne satýǵa bolady.
