Elimizde Abhaziia men Ońtústik Osetiianyń tirkeý nómirlik belgileri bar kólik quraldaryn respýblika aýmaǵyna zańsyz ótkizý jáne paidalaný jaǵdailary ósken. Bul týraly Mańǵystaý oblysy boiynsha Memlekettik kirister departamenti málimdedi, - dep habarlaidy Tengrinews.kz.
Avtokólikter Eýraziialyq ekonomikalyq odaqtyń (EAEO) kedendik aýmaǵyna Reseidiń ótkizý pýnktteri arqyly ýaqytsha ákelinedi, óz mártebesi boiynsha sheteldik taýar sanalady (iaǵni EAEO taýarlary emes) jáne kedendik baqylaýda bolady.
"Kólik quralynyń iesi Abhaziia, Ońtústik Osetiia zańdy tulǵasy bolsa, kólik quralynyń kedendik deklaratsiiasy (KQKD) nemese kólik quralynyń iesi osy respýblikalardyń rezident jeke tulǵalary bolsa, jolaýshylar kedendik deklaratsiiasy (JKD) ýaqytsha ákelýdi rastaityn qujat sanalady", - delingen habarlamada.
Abhaziiada jáne Ońtústik Osetiiada tirkelgen ýaqytsha ákelingen kólik quraldaryn Qazaqstanǵa negizinen Abhaziia Respýblikasynyń azamattary jáne az dárejede Resei Federatsiiasynyń azamattary ákeledi.
"Abhaziia jáne Ońtústik Osetiianyń tirkeý nómirlik belgileri bar kólik quraldaryn EAEO kedendik aýmaǵyna ákelýdi jáne Qazaqstan Respýblikasynyń rezidentterine berýdi júzege asyrǵan tulǵalardyń, sondai-aq memleketke keltirilgen zalal somasyna qarai kedendik tólemderdi tólemei jáne bastapqy memlekettik esepke qoimai Qazaqstan aýmaǵynda zańsyz paidalaný maqsatynda osyndai kólik quraldaryn satyp alǵan tulǵalardyń áreketterinde qylmystyq kodekste kózdelgen qylmys orny ne quramy, ne Qazaqstan Respýblikasynyń Ákimshilik quqyq buzýshylyq týraly kodeksine sáikes ákimshilik quqyq buzýshylyqtyń quramy bolady. Eki quram da jazadan basqa kólik quralyn tárkileýdi kózdeidi", - dedi MKD ókilderi.
