2021 jyldan bastap elimizdegi joǵary oqý oryndarynyń túlekterine jańartylǵan qosymshalary bar diplom beriledi. Ol qosymshada elimizde alǵan joǵary bilim biliktiliginiń eýropalyq biliktilik sanatymen sáikes ekeni mindetti túrde kórsetiletin bolady.
Qazaqstan Respýblikasynyń Joǵary bilim berý ulttyq biliktilik sheńberiniń ózdiginen sertifikattaý boiynsha esebin Bolon protsesiniń hatshylyǵy qabyldady, dep habarlaidy "Ult aqparat" QR Bilim jáne ǵylym ministrliginiń baspasóz qyzmetine silteme jasap.
Endi elimizdegi joǵary oqý oryndarynyń diplomdary Eýropa elderinde jaramdy bolady. Bul sheteldik azamattar tarapynan qazaqstandyq joǵary bilimge degen qyzyǵýshylyqty arttyrady.
Qazaqstandyq joǵary oqý oryndary túlekteriniń biliktiligi eýropalyq biliktilik sanatymen sáikes keledi. Bolon protsesi hatshylyǵy qabyldaǵan ózin-ózi sertifikattaý boiynsha esepti daiyndaý úshin Bilim jáne ǵylym ministriniń buiryǵymen vedomstvoaralyq jumys toby qurylǵan bolatyn. Onyń quramyna QR BǴM, QR Eńbek jáne halyqty áleýmettik qorǵaý ministrligi, «Atameken» QR Ulttyq Kásipkerler palatasy, salalyq qaýymdastyqtar jáne qazaqstandyq joǵary oqý oryndarynyń ókilderi kirdi.
Ózin-ózi sertifikattaý boiynsha esep Joǵary bilim berý úshin ulttyq biliktilik sheńberiniń Eýropalyq joǵary bilim berý keńistigimen (QR EJBK) úilesimdiligi men salystyrmalylyǵyn kórsetti. Bul Qazaqstannyń joǵary jáne joǵary oqý ornynan keiingi bilim berý jónindegi ulttyq júieniń eýropalyq joǵary bilim berý keńistiginiń bilim berý júielerimen sátti úilesimdiliginiń aiqyn dáleli bolyp tabylady.
«Bolon protsesi eńbek naryǵynda azamattardyń utqyrlyǵyn damytý, eýropalyq joǵary bilimniń básekege qabilettiligin arttyrý, joǵary bilimniń ulttyq júielerin úilestirý úshin 1999 jyly 29 eldiń Bilim ministrleriniń bastamashylyǵymen qurylǵanyn esterińizge salamyz»,-delingen habarlamada.
