Qazaqstannyń kásiporyndary el turǵyndaryn pandemiiaǵa qarsy qorǵanysh zattarymen tolyq qamtamasyz etip otyr, dep habarlaidy QazAqparat.
Bul týraly Indýstriia jáne infraqurylymdyq damý ministrligine qarasty Indýstriialyq damý komitetiniń tóraǵasy Marat Qarabaev aitty.
«Pandemiia kezinde otandyq kásiporyndary ózara jumylyp jumys istei aldy. Indet bastalǵan kezde otandyq óndirýshiler táýligine 130 myń medtsitsinalyq maska shyǵara alatyn edi. Qazir sol kásiporyndardyń qýattylyǵy kúnine 1,5 mln betperdege jetti. Iaǵni qysqa merzimde kásiporyndar jańa óndiris alańdaryn iske qosa aldy. Sol siiaqty otandyq kásiporyndar kúnine 330 myń qolǵap shyǵaratyn deńgeige jetti. Eldegi 6 zaýyt bir aida 500 myń qorǵanysh kostiýmderin shyǵaryp otyr. Bul óz qajettiligimizdi tolyq qamtamasyz etýge jetkilikti», - dedi komitet tóraǵasy ortalyq kommýnikatsiialar qyzmetinde.
Pandemiia órshigen tusta halyq ókpeni jasandy jolmen tynystandyratyn apparat tappai qysylǵany belgili. Qazir bul qondyrǵylardyń óndirisi de jolǵa qoiylyp otyr. Komitet basshysynyń sózine qaraǵanda, el astanasynda jedel qurylǵan zaýyt búginge deiin elimizdiń 17 óńirine de óz ónimin jetkizip úlgergen.
«Budan basqa ókpeni jasandy tynys aldyratyn apparat jasaityn zaýyt iske qosyldy. Qazir ondai apparattyń eki túrin shyǵarady. Ókpeni jasandy jeldetetin jedel apparat buryn da shyǵarylatyn. Pandemiia kezinde el ishinde 500 dana, Tájikstan jáne Qyrǵyzstan elderine gýmanitarlyq kómek retinde taǵy 300 apparat qoiyldy. Nur-Sultan qalasynda «Qazaqstan Aselsan injiniring» kompaniiasy tez arada iske qosylyp, ókpeni jasandy jeldetý úshin meditsinalyq kabinetterge qoiylatyn keshendi apparattar óndirisi uiymdastyryldy. Nátijesinde elimizdiń 17 óńirinde 297 aýrhanaǵa 1,5 myń sondai apparat jetkizildi», - dedi Marat Qarabaev.
