Qazaqstandyq rejisser Tólegen Baitókenovtyń túsirgen vestern janryndaǵy «Satash» filmi biyl qazannyń 12-21 aralyǵynda ótetin 34-shi Varshava kinofestivaliniń «1-2 Competition» atty konkýrstyq baǵdarlamasyna qatysady, dep habarlaidy QazAqparat tilshisi.
Filmdi QR Mádeniet jáne sport ministrligi tapsyrysy boiynsha Sh.Aimanov atyndaǵy «Qazaqfilm» AQ jaryqqa shyǵarǵan. Bul baiqaýda álemniń túkpir-túkpirinen kelgen rejisserdiń alǵashqy nemese ekinshi ret túsirgen tolyqmetrajdy kórkem filmderi kórsetiledi. Satash» filmi týǵan aýylyna basyp kirgen qylmyskerlermen jalǵyz kúreske túsken ýchaskelik politsei týraly baiandaidy.
Filmniń basty keiipkeri Satash esimdi aýyldyń ýchaskelik politseii aýyl turǵyndaryna kúsh jumsaǵan qylmyskerlerge tótep berip, óziniń boryshyn sońyna deiin óteidi.«Bizdiń túsirilim toby túsirgen filmdi osyndai beldi kinofestival tańdap alǵanyna qýanyp otyrmyn. Kartina kórermenderge arnalǵan janrlyq film bolyp shyqqan, dese de festivalderge qatysýǵa laiyqty bolyp shyqqany mańyzdy. «Satash» filmi - meniń alǵashqy tolyqmetrajdy týyndym. Sondyqtan bul filmime artyp otyrǵan úlken jaýapkeshilikti sezemin. Qazan aiynyń sońynda film otyndyq prokatqa shyǵady. Otandyq kórermenderdiń kóńilderinen shyǵady dep úmittenemin», - dedi rejisser Tólegen Baitúkenov.
1985 jyly qurylǵan Varshava kinofestivali álemge áigili Kann, Berlin jáne Venetsiia kinofestivalderi sekildi FIAPF (Halyqaralyq kinoprodiýserler qaýymdastyǵy federatsiiasy) tirkeýinen ótken. Festivaldiń maqsaty - álemdik kinematograftaǵy eń jańa ári qyzyqty jobalarymen tanystyrý.
«Bizdiń maqsatymyz, filmdi «Oskar» júldesin alǵanǵa deiin kórermenge kórsetip, al rejisserdi Kann kinofestivalinde marapatqa ie bolǵanǵa deiin tanystyrý. Biz álemge tanylǵan kinogerlerdiń sońynan júgirmeimiz. Mysaly, Mihael Haneke, Kristian Mýndjý, Pavel Pavlikovski, Ari Folman, Asgar Farhadi syndy basqa da kinogerler, ataq-dańqqa jetkenge deiin bizdiń festivaldiń qonaqtary bolǵan», - dep atap ótti Warsaw Film Festival festivaliniń uiymdastyrýshylary.
Sondai-aq Varshava kinofestivalinde táýelsiz jáne innovatsiialyq kinolarǵa arnalǵan «Free Spirit», sondai-aq derekti jáne qysqametrajdy filmderge arnalǵan konkýrstyq baǵdarlamalar bar. Al konkýrstan tys baǵdarlamalar sheńberinde «Polsha klassikasy», polshalyq qysqametrajdy filmder jáne halyqaralyq kinofestivalderde kórsetilgen álemdik filmder kórsetiledi.
