«Astana» velokomandasy álemde koronavirýstyń taralýyna bailanysty aldaǵy 15 kúnde ótetin jarystarǵa qatysýdan bas tartty, dep habarlaidy QazAqparat.
QR Ulttyq Olimpiadalyq komitetiniń málimetine sáikes, komanda músheleri búginnen bastap 20 naýryzǵa deiingi týrnirlerge qatyspaidy. Komanda menedjmenti men dárigerler birlese otyryp osyndai sheshim qabyldaǵan.
«Bul qadam arqyly velosportshylar men komanda qyzmetkerleriniń densaýlyǵyn saqtaýdy kózdeimiz. Koronavirýstyń álem boiynsha qarqyn alǵany bizdi alańdatyp otyr. Árine, biz barlyq jarysqa qatysýdy kózdegenbiz. Biraq biz úshin sportshylardyń densaýlyǵy mańyzdy. Alda óte mańyzdy iri jarystar tur. Bul óte qiyn sheshim, degenmen, óz sportshylarymyzdy qorǵaýymyz qajet», - deidi bas menedjer Aleksandr Vinokýrov.
Solaisha, «Astana» komandasy «Strade Bianke», «Parij – Nitstsa» jáne «Tirreno – Adriatiko» týrnirlerine qatyspaityn boldy.
Buǵan deiin QR Ulttyq Olimpiadalyq komiteti otandyq sportshylardy koronavirýstan saqtandyrý úshin ahýaldyq shtab quryp, jarys kestelerin qaita qarap jatqanyn habarlaǵan bolatynbyz.
